Dështon samiti për Gazën pas bombardimit të spitalit, Biden anulon vizitën në Jordani

Shtëpia e Bardhë ka njoftuar se Joe Biden megjithatë nuk do të udhëtojë në Jordani, si pjesë e udhëtimit të tij në Lindjen e Mesme.

Ministri i Jashtëm i Jordanisë, Ayman Safadi, ka thënë më herët se Jordania nuk mbështet samitin e planifikuar me presidentin amerikan, krerët egjiptian dhe ata palestinez që ishte dashur të mbahet në Amman.

Safadi në një bisedë për Al Jazeera ka theksuar se samiti është anuluar sepse “nuk ka kuptim tani të diskutohet për çfarëdo tjetër përveç ndaljes së luftës”, transmeton Telegrafi.

Pas publikimit të deklaratës nga Shtëpia e Bardhë, Biden është futur në aeroplanin presidencial Air Force One që do të fluturojë për në Izrael. Presidenti pritet të takohet të enjten me kryeministrin izraelit Benjamin Netanyahu.

Lexo po ashtu Ushtria izraelite publikon pamje: Këto janë dëshmitë që nuk e kemi sulmuar spitalin, e dimë kush e ka bërë

Vendimi i Joe Bidenit që të anulojë ndalesën e planifikuar në Jordani pas vizitës në Izrael, vjen pasi që Jordania anuloi samitin katër-palësh të enjten me presidentin amerikan dhe zyrtarët egjiptian dhe palestinezë.

Presidenti palestinez Mahmoud Abbas deklaroi më herët se nuk do të marrë pjesë në takimin në Jordani.

E zyrtarët e lartë palestinezë thanë se Abbasi në vend të kësaj do të rikthehet në Ramallah, në selinë e qeverisë së tij në Bregun Perëndimor, pas shpërthimit në spitalin e Gazës, që palestinezët thonë se vranë qindra persona dhe akuzojnë Izraelit që po i mohon kategorikisht akuzat të jetë përfshirë në sulm. /Telegrafi/