“Më dënojnë nganjëherë por mos u mërzitni ju” – Kurti flet për gjobën e gjykatës dhe diskutimet për formimin e qeverisë

Kryetari i Lëvizjes Vetëvendosjes, Albin Kurti, ka thënë se ka filluar konsultimet me komunitetet jo shumicë për formimin e qeverisë së re.

Ai tha të mërkurën se ka takuar kryetaren e Partia e Re Demokratike (NDS) nga komuniteti boshnjak, Emilija Rexhepi dhe kryetarin e Partisë për Liri, Drejtësi dhe Mbijetesë nga komuniteti serb, Nenad Rashiq.

Lexo po ashtu Emilija Rexhepi flet pas takimit me Kurtin: E mbështesim për kryeministër të qeverisë së re

Kurti bëri të ditur se shumë shpejt do t’i zhvillojë takime edhe me të tjerët, por pa specifikuar nëse një gjë e tillë do të ndodh edhe me ndonjë prej partive shqiptare që ka siguruar ulëse në Kuvend.

Kurti, i cili është edhe kryeministër në detyrë, nuk komentoi arsyet se pse këto takime po i zhvillon në Zyrën e Kryeministrit dhe jo në atë të partisë.

“Kemi filluar me takime zyrtare, me krerët e partive politike paradite kanë qenë Emilja Rexhepi dhe Nenad Rashiq. Do t’i takojmë edhe të tjerët”, tha ai.

I pyetur për dënimin nga Gjykata e Prishtinës me 250 euro për shkak të mos paraqitjes në Prokurorinë Speciale (PSRK) për të dëshmuar lidhur me rastin e rezervave shtetërore, Kurti me ironi tha se ndonjëherë e dënojnë atë, mirëpo sugjeroi gazetarët që të mos mërziten për një gjë të tillë.

Lexo po ashtu Albin Kurti dënohet me 250 euro që nuk shkoi për të dëshmuar në Prokurori

“Më dënojnë mua nganjëherë por mos u mërzitni ju”, tha Kurti.

Këto komente Kurti i bëri pas përurimit të çerdhes në lagjen “Rezinë” të Gjakovës. Ai tha se gjatë mandatit katërvjeçar shuma e investimeve për çerdhe ka arritur mbi 35 milionë euro.

“Shuma e investimeve për çerdhe ka arritur mbi 35 milionë euro. Krahas shumës prej 5 milionë eurove që po investohet nga fondet e IPA-s dhe punimet janë shtrirë në 25 komuna të vendit. Deri tani 21 çerdhe janë të përfunduara, 11 të reja, 10 adaptime nga shkolla në çerdhe dhe 39 çerdhe janë në proces të ndërtimit”, theksoi Kurti.

Kujtojmë, Lëvizja Vetëvendosje ka fituar zgjedhjet parlamentare të 9 shkurtit, me 42.3 për qind. E dyta renditet, PDK me 20.95 për qind, pasuar nga LDK 18.27 për qind dhe koalicioni AAK-Nisma 7.06 për qind. Në bazë të këtyre shifrave, Lëvizja Vetëvendosje do t’i ketë 48 deputetë, PDK 24, LDK 20, AAK-Nisma 8, dhe komunitetet jo shumicë 20 ulëse të rezervuara. /KP/