Debate në Kuvend për vrasjen e 14-vjeçarit në Tiranë, PD kërkon dorëheqjen e ministres së Arsimit

Vrasja e 14-vjeçarit një ditë më parë në shkollën “Fan Noli” në Tiranë ka përfshirë në debat politikën për sigurinë në shkolla.

Në seancën e sotme plenare, deputetja e Partisë Demokratike Ina Zhupa teksa kërkoi 1 minutë heshtje, tha se ishte ngjarje e paralajmëruar.

Ajo kërkoi dorëheqjen e ministres së Arsimit, Ogerta Manastirliu.

“Doja t’i kërkoja këtij Kuvendi 1 minutë heshtje dhe do doja të caktoja një orar që të ishim të gjithë dhe të ulnim kokën të gjithë se fajin e kjo ka qeveri. Uroj që zonja Manastirliu që s’ka ardhur këtu të jetë dukë nënshkruar dorëheqjen. Kur ne kemi ngritur zërin për oficerët dhe psikologët në shkolla është zgërdhirë Manastirliu”, tha Zhupa.

“Paktën e sigurisë në shkolla ku e çuat, te hashashi te droga që hyn nëpër shkolla. Thika, biçaku kjo është paketa? Si ka mundësi të nderuar kolegë që ne duhet ta kalojmë këtë me normalitet dhe nuk duhet të kërkojmë përgjegjës, nuk duhet të flasim, ne duhet të jemi të parët që të ngremë zërin, ju doni ta amnistoni ministren Manastirliu dhe të amnistoni Hoxhën. Ne flasim për skandal vetëm kur ka një vdekje”, tha Zhupa.

Kryetarja e Kuvendit Elisa Spiropali i ndërpreu fjalën duke thënë se i mbaroi koha për procedurë. “Ngjarja tragjike që na ka tronditur të tërëve, e përdorët për të bërë politikë procedurën”.

Edhe ministri i Shtetit për Marrëdhëniet me Parlamentin, Taulant Balla, reagoi ndaj deklaratave të deputetes Zhupa, dhe akuzoi opozitën se po e përdorur vdekjen e 14-vjeçarit për debat politik. Ai kërkoi nga opozita që të bashkohen për të miratuar paketën e sigurisë në shkolla.

“Humbja e jetës së atij nxënësi dhe atij djali të ri na ka prekur të gjithë. Është një përgjegjësi që na takon të gjithëve dhe bëhet me e madhe kur ngjarje kaq të rënda keqpërdoren për debat politike. Kanë 30 vite që përdoren, ti nuk kishte lindur kur ngjarje të tilla përdoren për politike zonja Zhupa. Ne kemi përgjegjësi për modelin që japim. Unë e kam bindje që na duhet një qasje tjetër sa i përket garantimit të perimetrit të sigurisë në shkolla, luftës kundër përdorimit të lëndëve narkotike dhe keqpërdorimit të rrjeteve sociale”, tha Balla.

“E dashur kolege sot duhet të bëhemi bashkë për të kaluar ato propozime për sigurinë në shkolla, na duhet t’i dyfishojmë ndëshkimet penale ndaj atyre që shesin dhe shpërndajnë lëndë narkotike në shkolla. Unë kisha detyrën që të raportoja për numrin e lartë të personave që shesin lëndë narkotike në shkolla dhe ju ishit kundër. Kjo ngjarje dihet që të na bëjë me përgjegjësi5të gjithëve dhe e ftoj opozitën të thotë ne jemi gati të mbështesim të gjitha masat drastike dhe ligjore. Jeni të ftuar në komisionin e ligjeve dhe të ashpërsojmë dënimet penale që lidhen e një qasje të re të garantimit të sigurisë në shkolla”, u shpreh Balla.

Po kështu edhe deputeti Etjen Xhafaj e cilësoi patetizëm politik reagimin e deputetes demokrate ndaj vrasjes së 14-vjeçarit Martin Cani dhe i kërkoi të mendojnë se çfarë duhet bërë për t’i zgjidhur.

“Si çdo prind tjetër që ka një djalë 14 vjeçar në shkollë ka mbajtur frymën dhe unë e kam një të tillë dhe nuk mund ti përkthesh në patetizëm politik dhimbjen e një familjeje që është shumë më reale sesa radikalizimi që doni t’i bëni një aksioni politik, se nëse kërkoni nga një dorëheqje çdo herë i bie që ti të bësh kriminel që ti mbarosh të gjithë dhe të bëhesh ti pastaj, se me ty mbarojnë të gjitha. Duhet të mendojmë se çfarë do të bëjmë për t’i zgjidhur këto, jo të bëjmë patetizma. Të ulemi dhe të mendojmë. Politika nuk mund të futet në çdo shtëpi për çdo vaki dhe vetmja zgjidhje sipas jush është të vini ju në pushtet”, theksoi Xhafaj. /Telegrafi/