Dani Carvajal mund të mos luajë më futboll

Legjenda e Real Madridit, Dani Carvajal, ka vetëm 50 për qind shanse për t’u rikuperuar nga lëndimi i rëndë i gjurit.

Spanjolli 32-vjeçar fitoi Ligën e tij të gjashtë të Kampionëve sezonin e kaluar dhe gjithashtu triumfoi në Euro 2024.

Por sezoni i tij përfundoi gjatë fitores 2-0 të Real Madridit ndaj Villarrealit të shtunën, pasi ai këputi ligamentin e kryqëzuar, ligamentin kolateral të jashtëm dhe tendinën popliteale.

Doktor Pablo Gelber, themelues dhe president i Komitetit të Lëndimeve Anësore të Gjurit të Shoqatës Evropiane të Gjurit, ka dhënë tani qëndrimin e tij për lëndimin e Carvajal – i cili e la mbrojtësin në lot.

Ai konfirmoi se do të duhen një minimum prej 12 muajsh për t’u rikuperuar dhe gjithashtu zbuloi në mënyrë tronditëse se mbrojtësi i djathtë ka vetëm 50 deri në 60 për qind shanse për t’u rikthyer në nivelin e tij optimal.

Duke folur për Marca, Dr Gelber tha: “Nga të gjithë faktorët për t’u rikthyer në sport, koha që nga operacioni është ndoshta më pak e rëndësishme. Është një faktor i domosdoshëm, por aspak i mjaftueshëm. Në këtë rast, nuk do të flisja për më pak se 12 muaj shërim”.

“Dhe një çështje tjetër është rikthimi në të njëjtin nivel sportiv, i cili, duke folur me shifra të ftohta, nuk është më shumë se 50 apo 60 për qind”.

“Një faktor negativ është se futbollistët priren të kenë këmbë varus, siç i quajmë teknikisht. Në thelb i referohet të kesh këmbë të përkulura, siç kishte për shembull Rivaldo në një mënyrë shumë të theksuar”.

“Ky fakt është një faktor negativ për rikuperimin e suksesshëm të këtyre lëndimeve, sepse i vë në stres të madh ligamentet që po rindërtohen, duke i shtrirë ato në nivele që e bëjnë operacionin të dështojë”.

“Tek njerëzit normalë, ne shpesh e korrigjojmë këtë devijim të këmbës për të shmangur këtë dështim të mundshëm, veçanërisht në rastet që kanë vazhduar për disa kohë që nga lëndimi”.

“Por te një futbollist profesionist ky korrigjim i formës së këmbëve është totalisht i kundërindikuar, sepse do të nënkuptonte fundin e karrierës së një futbollisti”.

“Nga ana tjetër, gjendja mendore në lëndime të tilla të rënda është e një rëndësie jetike, sepse zhgënjimi, frika dhe mendimet negative mund të dëmtojnë shërimin optimal”, ka shtuar më tej doktori.

Real Madridi mori vendimin e shkëlqyeshëm për të vazhduar kontratën me Carvajal deri në vitin 2026 pas lëndimit që do ta mbajë atë jashtë për pjesën tjetër të sezonit.

Ai ka qenë me Los Blancos që nga viti 2002 kur ishte 10 vjeç dhe konkurroi në të gjitha ekipet e tyre të të rinjve. /Telegrafi/