Daja i lumtur me fitoren ndaj Trepçës ’89, por më shumë për paraqitjen e dy talentëve të Ballkanit

Ballkani ka triumfuar me rezultat të thellë 7-2 ndaj Trepçës ’89 në kuadër të javës së 30-të në Albi Mall Superligën e Kosovës.

Trajneri i skuadrës nga Suhareka, Ilir Daja ka thënë pas ndeshje se forma e tyre po rikthehet në nivelin e lartë, derisa është i kënaqur edhe me lojën e dy talenteve të ekipit, Krenar Dulaj dhe Albin Berishës.

“Nganjëherë rezultati duket sikur e ke mposhtur kundërshtarin në të gjitha drejtimet. Por, ne e respektuan Trepçën ’89 në maksimum”, ka thënë fillimisht trajneri i Ballkanit për ArtSport.

Lexo po ashtu Ballkani turpëron Trepçën '89 - realizon njërën ndër fitoret më të thella në histori të futbollit kosovar

“Në periudhën e fundit kjo skuadër ka bërë paraqitje të mirë. Për asnjë moment nuk e ulëm ritmin. Na vjen mirë që vazhdojmë ciklin e fitoreve”.

“Jemi duke e ngritur gradualisht formën tonë. Nuk kemi pasur formë të dobët, por nuk e kemi pasur formën më të mirë. Besoj që sot kemi qenë efikas dhe realizuam ato situatat para portës”.

Lexo po ashtu Trajneri i Trepçës ’89 mundohet ta arsyetohej humbjen e thellë ndaj Ballkanit

“Me asistime të Albion Rrahmanit dhe Armend Thaqit jemi mësuar. Më vjen mirë që Berisha u prezantua me dy gola dhe ajo që më gëzon është se lojtarët edhe kur janë në pozita për të shënuar, luajnë me njëri-tjetrin”.

“Do të veçoja edhe prezantimin e 17-vjeçarit Dulaj që ka një të ardhme goxha të mirë”, potencoi më tej trajneri Daja. /Telegrafi/