COVID-19 nuk ka përfunduar, nëse nuk ndërmerren hapa urgjent në vendet e rrezikuara – numri i të infektuarve në botë mund të shkojë në një miliard

Një miliard njerëz në mbarë botën mund të infektohen me coronavirus, nëse vendeve të rrezikuara nuk u ofrohet ndihmë e shpejtë, ka paralajmëruar Komiteti Ndërkombëtar për Shpëtim (International Rescue Committee).

Organizata ndërkombëtare humanitare, që u themelua në vitin 1933 nga Albert Ajnshtajn, ka njoftuar se ndihma financiare dhe humanitare është shumë e nevojshme për të ngadalësuar përhapjen globale të virusit, transmeton Telegrafi.

Shumë vende që janë në zhvillim e sipër kanë përqindjen zyrtare të infektuarve apo numrin e të vdekurve shumë të ulët, por besohet se shifrat reale janë shumë më të larta, paralajmëron IRC.

Kjo organizatë ndërkombëtare rikujton se problemi kryesor me të cilin po ballafaqohen vendet që janë në zhvillim e sipër apo edhe ato vende jostabile – është mungesa e pajisjeve medicinale dhe barnave për shërimin e pacientëve të prekur me COVID-19.

Në Afganistan dhe Pakistan ka më pak se 10 respiratorë në 10 milionë banorë, kurse në Nigeri kjo shifër është më e vogël – 0,8 në një milion.

Italia, që ka përqindjen më të lartë të vdekshmërisë nga coronavirusi në botë, ka pasur 80 respiratorë në një milion njerëz në fillim të krizës.

Për këtë arsye “vendet jostabile” si Afganistani dhe Siria, kanë nevojë urgjente për financim me qëllim që të shmanget epidemia e madhe, raporton BBC.

Në raportin e bazuar në modelet dhe të dhënat e Organizatës Botërore të Shëndetësisë dhe Universitetit Imperial në Londër, vlerësohet se globalisht mund të jenë 500 milionë deri në një miliard të infektuar me coronavirus.

Gjithashtu është thënë se mund të ketë më shumë se tre milionë të vdekur ne vendet e goditura nga luftërat dhe jostabiliteti.

“Këto shifra do të duhej të shërbenin si thirrje për veprim”, ka deklaruar presidenti i Komitetit, David Miliband.

Ai pranoi se tani është momenti kyç që donatorët me urgjencë të fillojnë në mënyrë fleksibile me financimet.

“Qeveritë duhet të punojnë bashkë, për të larguar çfarëdo barriere në të cilën mund të hasin gjatë ndihmës humanitare”, ka shtuar Miliband. /Telegrafi/