Çka është meningjiti dhe cilat janë simptomat që paraqiten?

Meningjiti është një infeksion i membranave mbrojtëse që rrethojnë trurin dhe palcën kurrizore, ndërkaq mund të prekë të gjitha moshat, por më e zakonshme është te fëmijët.

Lidhur me këtë sëmundje në podcastin “Shëndeti në rend të parë”, ka folur infektologu Valbon Krasniqi.

“Meningjiti është një sëmundje infektive që prek cipat trunore, e që mund të kalojë edhe në tru… Simptomat kryesore të një meningjit janë kokë-dhimbje e fortë që shkon duke u rritur, temperaturë e lartë, vjellje, fotofobia – pengesa e dritës, ndonjëherë edhe e zhurmës.

Ka edhe disa simptomat tjerë si shtangimi i qafës…. Nëse preket edhe truri mund të ketë edhe humbje të vetëdijes, fëmijët në këto raste mund të kenë edhe ngërçe, përgjumje, refuzim të ushqimit”, tha ai.

Tutje, Krasniqi tha se te fëmijët deri në 1 vit mund të vërehet edhe pulsim i fontanellës.

Ky podcast sponsorizohet nga Spitali i Përgjithshëm Rezonanca 2.

Podcastin e plotë ku infektologu Valbon Krasniqi flet për dallimin ndërmjet gripit dhe flamës, simptomave të infeksionit në organizëm, meningjiti, lia e ujit, etj mund ta shikoni më poshtë. /Telegrafi/