Cilat janë simptomat që tregojnë se mund të kemi sëmundje reumatike? Flet doktor Besim Demolli

Në podcastin “Shëndeti në rend të parë”, reumatologu Besim Demolli ka folur për sëmundjen reumatizmale.

Ai ka treguar se cilat janë simptomat që tregojnë se mund të kemi sëmundje reumatike.

Doktori Demolli theksoi se sëmundjet reumatike janë një grup jashtëzakonisht i madh i sëmundjeve që në një ombrellë quhen si reuma dhe numri i tyre kalon 200 sosh.

“Çdo problem që neve na lidhet me nyje, në kuptim të dhimbje të nyjave të shoqëruar ose jo me ënjte, të shoqëruara ose jo me shtangime mëngjesore na bën të dyshojmë për ndonjë problem reumatik. Ato mund të manifestohen edhe me dhimbje qafe, dhimbje fund shpine, por gjithashtu edhe me ndryshime  lëkurore…”, tha ai.

Tutje, reumatologu Demolli tha se sëmundjet reumatike në bazë të shfaqjes klinike ndahen në tri faza: faza akute, ku ndodhin gjashtë javët e para, faza sub-akute gjashtë javë deri në tre muaj dhe faza kronike mbi tre muaj.

Doktor Demolli theksoi më tej se një pjesë e madhe e sëmundjeve reumatike mund të fillojnë gradualisht dhe të diagnostikohen vonë për shkak të manifestimeve të vogla klinike ose për shkak të neglizhencës qoftë të pacientit, qoftë të profesionistit shëndetësor në drejtim të referimeve të drejta.

Cak i tyre janë sistemi artikular, ligamentet, nyjet në përgjithësi, tentivat, kockat etj.

Podcasti “Shëndeti në rend të parë” mbështetet nga kompania Muqa Solar.  /Telegrafi/