Cakaj takohet me kryetarin e Bujanocit, diskutojnë për fshirjen e adresave të shqiptarëve në Luginën e Preshevës

Ministri në detyrë për Evropën dhe Punët e Jashtme në Shqipëri, Gent Cakaj, ka zhvilluar një takim me Kryetarin e Komunës së Bujanocit, Nagip Arifin.

Përmes një postimi në Facebook, Cakaj shprehu mbështetjen e tij të plotë për koalicionin e shumicës shqiptare në Bujanoc.

Cakaj poshtu ka shprehur shqetësimin për fshirjen e adresave të shqiptarëve në të gjithë Luginën e Preshevës, veçanërisht në Medvegjë.

Postimi i plotë i Cakajt

Kënaqësi e veçantë, sot, takimi edhe me Kryetarin e Komunës së Bujanocit, z. Nagip Arifi.

Takimet tona nuk janë asnjëherë të tepërta sepse numri i çështjeve që kërkojnë angazhim të përbashkët është i jashtëzakonshëm.

Falënderues për punën e vyer deri më tani dhe mbështetje e plotë për koalicionin e shumicës shqiptare në Bujanoc! Pas koalicionit të Luginës së Bashkuar, puna e këtij koalicioni është e një rëndësie të jashtëzakonshme për të gjithë shqiptarët e Luginës së Preshevës.

Ndamë, po ashtu, të njëjtin shqetësim lidhur me fshirjen e adresave të shqiptarëve në të gjithë Luginën e Preshevës, veçanërisht në Medvegjë.

Pavarësisht sfidave, ne do të punojmë bashkërisht e pakursyer për ngritjen e faktorit shqiptar në Luginën e Preshevës.