Biden thotë se pushtimi i Gazës nga Izraeli do të ishte një “gabim i madh”

Presidenti amerikan Joe Biden paralajmëroi Izraelin kundër pushtimit të Gazës në një nga thirrjet e tij më të dukshme publike për përmbajtje, ndërsa izraelitët u përgjigjen sulmeve të këtij muaji nga Hamasi.

Në një intervistë me “60 Minutes” të CBS që u transmetua të dielën, Biden tha se do të ishte një “gabim i madh” që Izraeli të pushtonte Gazën.

Izraeli ka sinjalizuar se po përgatitet për një pushtim tokësor të Gazës, edhe pse një krizë humanitare po rritet brenda këtij territori.

Biden ka bërë thirrje për mbrojtjen e civilëve dhe Shtetet e Bashkuara kanë punuar për të zbutur mungesat e ushqimit, ujit dhe gazit.

“Ajo që ndodhi në Gaza, sipas mendimit tim, është se Hamas dhe elementët ekstremë të Hamasit nuk përfaqësojnë të gjithë popullin palestinez”, i tha Biden, shkruan CNN, përcjell Telegrafi.

Biden tha se beson se Hamasi duhet të eliminohet tërësisht, “por duhet të ketë një Autoritet Palestinez. Duhet të ketë një rrugë drejt një shteti palestinez”.

Komentet janë një nga të paktat herë që presidenti i SHBA-së i ka bërë thirrje Izraelit që të përdorë një lloj vetëpërmbajtjeje për t’iu përgjigjur sulmeve të Hamasit që lanë të vdekur 1,400 izraelitë.

Në përgjigjen e tij, Izraeli nisi një fushatë masive bombardimi kundër Rripit verior të Gazës, nga i cili Hamasi filloi sulmin e tij. /Telegrafi/