Biden tani thotë se SHBA do të ketë mjaftueshëm vaksina për çdo të rritur, deri në fund të majit

Presidenti amerikan Joe Biden ka thënë të martën se Shtetet e Bashkuara do të kishin mjaftueshëm doza vaksine për Covid-19 për çdo amerikan të rritur deri në fund të majit.

Kështu, siç shkruan CNN, përcjell Telegrafi, Biden “ka përshpejtuar në mënyrë dramatike afatin e tij kohor”, por duke pranuar se vendi duhet të jetë akoma vigjilent ndaj virusit.

Ai gjithashtu njoftoi se ai do t’i udhëzonte shtetet që t’i jepnin përparësi mësuesve në planet e tyre të vaksinimit, duke ritheksuar një angazhim për kthimin e nxënësve në klasa mes një qëndrimi konfuz të administratës se kur dhe si mund të hapen shkollat përsëri.

Sidoqoftë, vë në pah CNN, data e re nuk do të thotë që të gjithë amerikanët do të merrnin vaksinat deri më 31 maj; çështjet me shpërndarjen dhe personelin nënkuptojnë se mund të duhet shumë më shumë që të gjitha dozat të administrohen.

Por vlerësimi më i shpejtë, i ndihmuar së bashku nga një partneritet i ri midis prodhuesve kryesorë të ilaçeve amerikane, flet për një objektiv optimist ndërsa miliona amerikanë presin të marrin dozat e tyre të para.

Afati kohor “përshpejtohet” me dy muaj nga “qëllimi i mëparshëm i administratës” për të pasur vaksina të mjaftueshme deri në fund të korrikut.

“Ky është përparim”, ka thënë Biden në deklaratat nga Shtëpia e Bardhë, duke paralajmëruar se mund të ketë akoma vonesa në marrjen e vaksinave nga amerikanët dhe duke sugjeruar se vendi nuk do të kthehet në normalitetin e plotë për shumë më gjatë.

“Ka dritë në fund të tunelit… Por ne duhet të qëndrojmë vigjilent, të veprojmë shpejt dhe në mënyrë agresive dhe të kujdesemi për njëri-tjetrin…”, ka thënë më tej Biden. /Telegrafi/