Besa e Pejës ankohet për ndarje të drejtësisë në ndeshjen ndaj Drenicës

           FC Besa Peja përmes një reagimi zyrtar në rrjetin social Facebook është ankuar për ndarje të drejtësisë në takimin ndaj Drenicës.

Klubi pejan akuzoi direkt gjyqtarin Bardh Ajeti duke pretenduar se ai ndikoi drejtpërdrejtë në rezultatin përfundimtar të këtij takimi.

Tutje ata kërkuan nga organet kompetente që të merren masat e nevojshme për këtë rast pasi sipas tyre nuk është e drejtë duke marrë parasysh investimet që kanë bërë.

Kujtojmë se ndeshja mes Besës së Pejës dhe Drenicës ka përfunduar me rezultat të barabartë 0-0.

Reagimi i plotë i Besës së Pejës:

“Në emër të FC BESA PEJA, po e shfaqim pakënaqësinë dhe deshprimin e thellë për dëmtimin e pamerituar që ekipi jonë pësoi nga referimi skandaloz i referit kryesor Bardh Ajeti dhe ansorit Albion Qelaj në ndeshjen ndaj KF Drenicës”.

“Ky referim e ka ndiku rrjedhën e lojës dhe rezultatin, duke u bërë padrejtësi lojtarëve, stafit dhe tifozëve tonë që sot ishin në numër të madhë”.

“Si klub i ri, e kemi nisë këtë rrugëtim duke besu në drejtësinë dhe profesionalizmin e organeve të futbollit në Kosovë. Kur ne investojmë mund, kohë dhe përkushtim për me kriju një ekip të fortë e të ndershëme, kërkojmë që edhe organet e drejtësisë sportive me vepru drejt e pa asnji ndikim, me marrë masat e nevojshme ndaj këtyre rasteve që e dëmtojnë sportin”.

“Ftojmë organet përkatëse që me reagu sa ma shpejt, sepse klubet po investojnë shumë për me e ngrit futbollin në vendin tonë, dhe të gjitha klubet meritojnë nji trajtim të barabartë e të drejtë në çdo ndeshje”, thuhej në njoftimin e Besës./Telegrafi/