“Babi përse e bëre”, 8-vjeçarja dëshmoi ngjarjen e rëndë të vrasjes së shqiptares në Amerikë

Mediat amerikane kanë dhënë detaje të reja pas vrasjes makabre të shqiptares në Amerikë.

Siç raporton Fox13news, shqiptari Renato Muhaj vrau ish të dashurën e tij 32-vjeçare, Suela Saliaj, rrahu prindërit dhe rrëmbeu vajzën e tij 8-vjeçare.

Policia ka thënë se rreth orës 02:30 të natës, Renato Muhaj fillimisht kishte ushtruar dhunë fizikee ndaj prindërve të tij, në apartamentin ku jetonin dhe i kërcënoi me hanxhar.

Ai iu mori dhe telefonat në mënyrë që të mos kërkonin ndihmë.

Oficerët që po hetonin këtë sulm, kontaktuan me kolegët e tyre dhe u kërkuan që të bënin një kontroll në shtëpinë e ish-të dashurës së Muhajt, 32-vjeçares Suela Saliaj dhe vajzës së tyre 8-vjeçare.

Kur policia shkoi në adresën e viktimës, jashtë apartamentit të saj pa shenja gjaku, së bashku me një thikë dhe doreza hekuri të mbuluara me gjak.

Oficerët e gjetën Suelën të pajetë në dhomën e gjumit. Ajo ndodhej në dysheme, e mbuluar nga gjaku dhe me një plagë të madhe në fyt.

Pasi nuk arritën të gjenin vajzën e 8-vjeçare, autoritetet shpallën alertin AMBER, (reagimi urgjent për personat e zhdukur).

Rreth orës 08:30 të mëngjesit arritën të lokalizonin telefonin e 34-vjeçarit dhe mësuan se ai ishte ende në zonë. Një oficer identifikoi makinën e të dyshuarit. Në këtë pikë një detektiv kaloi pranë mjetit me veturë dhe dalloi se brenda kishte njerëz.

CSI is here investigating the gold Kia that was at the center of this morning’s Amber Alert. A tow truck is nearby ready to pull it away as evidence. The suspect is in custody and 8-year-old girl safe ⁦@BN9⁩ pic.twitter.com/4G1Othhxis

— Angie Angers (@angie_angers) January 29, 2024

Dy vetura civile e rrethuan nga të dyja anët duke e vënë në pranga Muhajn. Ata gjetën edhe vajzën e tij 8-vjeçare.

Sipas mediave amerikane, vajza e vogël i tregoi policisë se e kishte parë 34-vjeçarin ta godiste të ëmën me thikë dhe dorezë hekuri disa herë, në dhomën e gjumit.

8-vjeçarja i tha policisë se e dinte që e ëma kishte vdekur dhe se e kishte pyetur të atin: “Përse e bëre këtë?”

Vajza tha se përgjigja e babait të saj ishte se “me të vërtetë donte që ajo të vdiste”.

Pasi vrau 32-vjeçaren, Muhaj e mori vajzën nga shtëpia duke e tërhequr me nxitim nga shkallët. Për pasojë ajo u rrëzua.

Vajza tregoi se ai e kishte tërhequr me forcë në veturë gjatë kësaj kohe ajo kishte pësuar lëndime.

Muhaj është akuzuar për vrasje të shkallës së parë, rrëmbim dhe abuzim të fëmijëve.

Ai po ashtu përballet me dy akuza për sulm të rëndë, dy akuza për kërcënim të një dëshmitari dhe katër akuza të tjera penale.

Kreu i Departamentit të Policisë deklaroi se Muhaj dhe Saliaj kishin pasur një lidhje nga ku kishte lindur dhe vajza 8-vjeçare, por nuk kishin qenë asnjëherë të martuar.

Vajza jetonte me të ëmën, ndërsa 34-vjeçari jetonte në një tjetër adresë.

Momentalisht nuk dihen shkaqet e kësaj ngjarjeje të rëndë.

Familja e Saliajt i tha policisë se Muhaj nuk kishte qenë i dhunshëm në të shkuarën.

Ai po ashtu nuk rezulton të ketë precedentë të mëparshëm penale./Telegrafi/