Avokati Halimi flet për akuzat ndaj ish-klientit të tij për vrasjen e Ivanoviqit: Akuzat ndaj Ejupit janë “çorbë” e Beogradit

Mediat e afërta me presidentin e Serbisë, Aleksandër Vuçiq, kanë raportuar se ai ka përmendur, Florim Ejupin si vrasës të Oliver Ivanoviqit.

Avokati Mahmut Halimi në një prononcim për Telegrafin këto akuza të rënda për ish-klientin e tij, i ka quajtur trillim dhe çorbë të Beogradit, që siç tha ai, nuk po mund të dalë kurrsesi nga përgjegjësia për vrasjen e Ivanoviqit.

Avokati Halimi ka thënë se ndaj ish klientit të tij nuk ka asnjë procedurë kundër tij.

“Beogradi nuk po mund të dal kurrsesi nga përgjegjësi për vrasjen e Ivanoviqit, dhe po mundohen me metoda të tilla të cilat veçse janë të njohura. Kjo s’është kurrfarë risie…Një trillim i kulluar”, ka thënë ai.

Halimi po ashtu i ka thënë Telegrafit se Ejupi e jeton jetën e  tij duke mos marr fare me këto akuza.

“Njeri është duke u marrë me punët e veta, me jetën e tij, njëherë e përgjithmonë i ka qitë mbrapa shpine akuzat. Ish-klienti im është duke e vazhdu jetën e vet dhe s’merret me këtë punë hiç”, ka thënë Halimi.

Avokati Halimi theksoi se përderisa vet presidenti i Serbisë përzihet në interesin e hetimeve, dihet se çfarë qëndron prapa.

“Bëhet fjalë për një shtet kriminal ku inkorporohet edhe kryetari i shtetit, prononcohet edhe përzihet në interesin e hetimeve”, tha ndër të tjera avokati Halimi. /Telegrafi/