Ava Max publikon klipin e ri “Every Time I Cry”

Këngëtarja shqiptare me famë ndërkombëtare, Ava Max, ka publikuar së fundmi klipin e këngës “Every Time I Cry”.

Klipi vjen me shumë elemente mistike, duke iu përshtatur kështu baladës, titulli i së cilës në shqip do të thotë “Çdo herë unë qaj”.

Kënga përndryshe është kompozuar dhe shkruar nga Caroline Pennell, Lauren Aquilina, Sean Myer, Henry Walter dhe vet Ava Max.

Artistja shqiptare, emri i vërtetë i së cilës është Amanda Koçi, vazhdon të jetë shumë aktive dhe të shijojë suksesin e albumit të saj muzikor më të fundit, “Heaven and Hell”.

Ky album të cilin ajo e publikoi në shtator, u ngjit shumë shpejt në majat e klasifikimit në top listat ndërkombëtare, ndërsa ishte albumi i tretë më i dëgjuar i vitit 2020 nga një artiste femër në Spotify.

“‘Heaven & Hell”’ është një album rreth dualitetit. Bëhet fjalë për tensionin mes së mirës dhe të keqes, së drejtës dhe së gabuarës, mes po-së dhe jo-së. Unë mendoj se të gjithë e ndiejmë atë tension çdo ditë në mënyrën se si veprojmë, atë që themi dhe veprimet që zgjedhim – është një nga ballafaqimet më të mëdha të jetës”, kishte thënë artistja me renome botërore në një intervistë ekskluzive për Telegrafin këtë fillim-vit.

Lexo po ashtu Ava Max intervistë ekskluzive për Telegrafin: Krenohem që jam shqiptare, ju premtoj se shumë shpejt do të vij në Shqipëri

Ava Max gjithashtu ka cekur se fatkeqësisht  nuk ka qenë asnjëherë në Shqipëri ose Kosovë por që shpreson që së shpejti të mund të vijë. /Telegrafi/