Autoritetet në Rusi detyrojnë mediet të fshijnë lajmet hulumtuese që kanë të bëjnë me Putinin dhe Kadyrovin

Autoritetet në Rusi kanë detyruar disa medie të fshijnë lajmet dhe hulumtimet që lidhen vajzën jashtëmartesore të presidentit Vladimir Putin dhe gruan e dytë të supozuar të udhëheqësit çeçen Ramzan Kadyrov.

Mbikëqyrësi shtetëror i medieve Roskomnadzor, njofton se transmetuesi i pavarur Dozhd duhet të fshijë 30 artikuj dhe video.

“Në paralajmërimin e Roskomnadzor thuhet se materialet duhet të fshihen menjëherë, pra brenda një dite”, njofton Dozhd.

Media tha se materiali i saj përfshinte raportimin për pronat e zyrtarëve të lartë të Kremlinit dhe lidhjet e tyre me figura të errëta – përveç vajzës së dyshuar jashtëmartesore të Putinit dhe gruas së dytë të supozuar të Kadyrovit.

Lexo po ashtu Në prag të zgjedhjeve parlamentare, Kremlini e shpall 'agjent të huaj' televizionin e pavarur rus 'Dozhd'

Faqja e lajmeve Znak.com tha se mori 15 paralajmërime nga Roskomnadzor për të fshirë materialin bazuar në këtë raportim.

Ndërsa, media Bell mori 10 paralajmërime të tilla, ka treguar kryeredaktori i saj për Dozhd.

Medie të tjera ruse që morën njoftime të ngjashme për të fshirë materialet, përfshijnë Meduza dhe The Village.

Ndihmësi i ngushtë i kritikut të Kremlinit, Alexei Navalny, Leonid Volkov fshirjet e materialeve i ka konsideruar si një akt censurimi retroaktiv dhe orwellian. /Telegrafi/