Arsyet më të pazakonta pse është dashur të anulohen fluturimet e aeroplanëve (Foto)

Zbrazja e lëngut të portokallit, aeroplani i lënë për një kohë të gjatë në diell dhe piloti i dehur, janë disa nga arsyet më të çuditshme, pse është dashur të bëhet shtyrja e fluturimeve të aeroplanëve.

Studimi i qindra kërkesave për kompensim, ka zbuluar disa nga rastet më bizare, që kanë detyruar  anulimin e orarit të paraparë, transmeton Telegrafi.

Pasagjerët janë kompensuar me disa mijëra euro, për shkak se kanë mbetur pa shkuar në vendin e duhur në kohën e kërkuar.

FlightDelays.com zbulon se rasti më i çuditshëm, është shtyrja e fluturimit nga Liverpul në Malaga, shkaku i një udhëtari që e ka rrëzuar pa dashje një gotë. Lëngu i portokallit që ndodhej në të, ka depërtuar nëpër kabllo dhe ka shkaktuar një ndezje elektrike që e ka bllokuar sistemin.

Tjetër anulim fluturimi ka ndodhur katër vite më parë, kur fluturimi nga Turqia në Mançester, është anuluar nën arsyetimin se aeroplani ka qëndruar gjatë në diell.

Hyrja e një lakuriqi nate në aeroplan, ka bërë që fluturimi nga Montpellier për në Luton të shtyhet për 24 orë, sepse askush nuk po mund ta kapte krijesën që lëvizte brenda.

Udhëtarët kanë pritur për 29 orë, derisa fluturakja që do duhej të shkonte nga Londra për në Denver, ka mbetur pa karburante dhe më pas e ka goditur vetëtima. Por, në momentin që gjithçka ka qenë në rregull për fluturim, stafi janë larguar sepse e kishin kryer orarin e punës.

Piloti që do duhet të ishte në krye të fluturimit nga Liverpuli për në Madrid, ka shkuar shumë i dehur në punë, sa që nuk ka mundur të ecë si duhet, e lëre më të drejtonte fluturaken, duke bërë që orari i fluturimit të shtyhet për të nesërmen.

Banjat e papastra, apo mungesa e mjeteve higjienike, ka qenë po ashtu në mesin shkaktarëve bizar, që kanë bërë që të mos niset aeroplani. /Telegrafi/