Arkëtari zbulon detaje të asaj se çfarë kishte ndodhur para  vrasjes së George Floyd, fillon gjykimi për krimin që tronditi botën

Christopher Martin, arkëtari nga marketi ku kishte qenë George Floyd para se polici Derek Chauvin t’i shkaktonte plagë vdekjeprurëse, ka thënë sot në seancën dëgjimore se i ndjeri kishte sjellje të një “të droguari”, por që ishte në gjendje të komunikonte me tjerët.

Disa dëshmitarë në mesin e tyre edhe një djalë 9-vjeçar, dy ditë më parë e kishte treguar në gjykatë se si për të kishte qenë shokuese që kishte parë Floyd po ndërronte jetë derisa Chauvin i mbante gjurin në qafë, transmeton Telegrafi.

Madje në gjykatë janë publikuar pamjet ku shihet Floyd i disponuar në market, disa minuta para se të përfundonte nën gjurin e policit. Ndryshe videoja është filmuar më 25 maj të vitit të kaluar, duke shkaktuar protesta masive në mbarë Shtetet e Bashkuara.

Chauvin menjëherë ishte shkarkuar nga detyra pas publikimit të pamjeve ku shihet duke ia mbajtur gjurin në qafë tashmë të ndjerit – i cili qëndronte i shtrirë me fytyrë për asfalti dhe ishte i prangosur. E polici që po akuzohet për vrasje ka thënë në gjykatë se nuk ndihet fajtor pas akuzës që rëndon mbi të – “për vrasje”.

Deri te tragjedia erdhi kur Floyd ia dha arkëtarit të marketit Christopher Martin, 19-vjeç, një bankënotë prej 20 dollarë. Ai kishte menduar se bëhet fjalë për para të falsifikuara, kështu menjëherë e raportoi tek menaxheri i lokalit – e disa minuta më vonë është arrestuar Floyd nën akuzën se kishte tentuar të përdor para të falsifikuara. /Telegrafi/