Arena e vakive

Nga inkuadrimi në fushë i zyrtarit të Trepçës ’89, Ilir Bojku, përjashtimet e Kosumit, prekjet e topit me dorë në zonë, e deri te goli i parë i Guraziut. – Këto janë disa nga vakitë që përshkruan arenat e javës 12 në Raiffeisen Superligë.

Bojku në fushë për ta rrahur gjyqtarin

Drejtori sportiv i Trepçës ’89, Ilir Bojku, në minutën 90 të ndeshjes me Feronikelin, nuk mundi të mbajë veten. Ai pas mosakordimit të një penalltie dhe anulimit të një goli për skuadrën e tij, hyri në fushë me qëllimin për të sulmuar gjyqtarin kryesor Besfort Kosumi. Ishin lojtarët ata që ndalën Bojkun.

Kosumi me pesë përjashtime

Gjyqtari i ndeshjes Trepça ’89 – Feronikeli, Besfort Kosumi bëri hiq më pak se pesë përjashtime. Në fushë ndëshkoi dy lojtarë, Isa Eminhazeri e Elvis Osmani, kurse nga bankina e Feronikelit përjashtoi tre persona zyrtarë që qëndronin në bankinë.

Elvis Osmani me kartonin e parë të kuq në karrierë

Sulmuesi veteran i Trepçës ’89, Elvis Osmani, kurrë gjatë karrierës së tij nuk kishte marrë karton të kuq. Ai në elitën e futbollit kosovar luan që nga para lufta, kurse ngjyra e kuqe iu tregua tek të dielën në sfidën me Feronikelin. Ai u ndëshkua pasi ofendonte gjyqtarin anësor S.Haziri, që ia anuloi golin.

Tri prekje me dorë në zonë, asnjë penallti

Në javën 12 u përshkruan tri prekje të topit me dorë në zonë, ndërsa gjyqtarët nuk akorduan asnjërën penallti. Me dorë luajtën Isa Eminhazeri i Feronikelit, Dukagjin Gashi i Drenicës dhe një lojtar i Hysit.

Besa e Drita me brekë e çorapë të njëjta

Futbollistët e Besës dhe ata të Dritës, në përballjen e së dielës patën çorapet dhe brekët sportive të njëjta, gjë që nuk është e lejueshme. Të dyja palët patën brekët dhe çorapet me ngjyrë të bardhë. Ata dalloheshin vetëm nga fanellat.

Besa fiton për herë të parë me më shumë se një gol

Për herë të parë Besa ka fituar me më shumë se një gol në Pejë. Këtë herë Besa fitoi 2:0, kurse në tri fitoret tjera në ‘Shahin Haxhiislami’, rezultati ishte 1:0.

Hej, ka shënuar Guraziu

U desh të vije ndeshja e parë e fazës së dytë që sulmuesi i Hajvalisë, Fillim Guraziu të shënojë golin e parë. Ai në edicionin e kaluar në 11 xhirot e para kishte shënuar më shumë se 10 gola, kurse tani tek në javën 12 ia bëri sefte. Ai realizoi në humbjen 5:1 nga Drenica.

Shënon Trepça ’89, tifozët në fushë

Në momentin që Trepça ’89 shënoi golin e vetëm me Feronikelin, tifozët vendas vërshuan fushën për të ndarë gëzimin me autorin e golit, Labinot Jetullahu.

Krejt ‘njësha’

Në zhargonin bastoresk java 12 do të quhej ‘krejt njësha’. Kështu, të gjashtë ndeshjet u takuan vendasve, që shënuan fitore. Kjo është hera e parë këtë edicion, që të gjitha sfidat u takojnë mikpritësve.

Krasniqi pëson humbjen e parë pas 14 ndeshjeve

Trajneri i Feronikelit, Ramiz Krasniqi ka pësuar humbjen e parë në Superligë, pas 14 ndeshjeve radhazi. Në 12 ndeshje nuk kishte humbur edicionin e kaluar, dhe në dy këtë kampionat. Ai humbi nga Trepça ’89.

Drenica, 7 ndeshje radhazi pa humbje

Drenica si askush tjetër këtë edicion. Nën drejtimin e trajnerit Afrim Jashari, ata kanë quar në 7 numrin e ndeshjeve radhazi pa humbje, më së shumti në këtë kampionat.

Ilir Avdyli, katër ndeshje pa pësuar gol

Portieri i Ferizajt, Ilir Avdyli, nuk e ka nxjerrë topin nga porta, që nga takimi i fituar 5:1 me Besën e Pejës, e që i takonte javës 8. Ai në katër ndeshjet e radhës nuk ka pësuar gol, ose ndryshe 372 minuta (përfshirë edhe 12 minuta nga ndeshja me Besën). /Tribuna/Telegrafi/