Arabia Saudite do të jetë “e mbyllur plotësisht” gjatë festës së Bajramit

Arabia Saudite do të zbatojë një bllokim 24-orësh në të gjithë vendin gjatë festës pesë-ditore të Fitër Bajramit, për shkak të coronavirusit.

Sipas Al Jazeera, përcjell Telegrafi, një mbyllje e plotë do të vendoset nga 23 deri në 27 maj pas përfundimit të muajit të agjërimit të Ramazanit, tha ministria e brendshme në një deklaratë të publikuar nga Agjencia Saudite e Shtypit të martën.

Deri atëherë, ndërmarrjet tregtare dhe afariste do të qëndrojnë të hapura siç janë tani dhe njerëzit mund të lëvizin lirshëm midis orës 9 të mëngjesit dhe 5 pasdites, përveç në qytetin e shenjtë të Mekës i cili mbetet nën një bllokim të plotë të lëvizjes, thuhet në deklaratë.

Mbretëria, e cila ka raportuar numrin më të madh të rasteve të coronavirusit në rajonin e Gjirit, po përpiqet të kufizojë përhapjen e sëmundjes vdekjeprurëse.

Të martën, ministria e shëndetësisë tha se numri i vdekjeve të COVID-19 ishte rritur në 264 dhe konfirmoi 42.925 infeksione.

Arabia Saudite më parë kishte imponuar një bllokim 24-orësh në shumicën e qyteteve, por i lehtësoi ato muajin e kaluar për fillimin e Ramazanit.

Qendrat tregtare dhe shitësit me pakicë u lejuan të rihapeshin, përveç në zonat kryesore “të nxehta”, përfshirë Mekën – ku numrat e rasteve të konfirmuara janë rritur, me gjithë një bllokim të rreptë.

Ndërkohë në mars, Arabia Saudite pezulloi rrugëtimin gjatë gjithë vitit të Umrah, në mes të frikës se sëmundja mund të përhapet në qytetet më të shenjta të Islamit.

Autoritetet nuk kanë njoftuar ende nëse do të vazhdojnë me Haxhin e këtij viti – të planifikuar për në fund të korrikut – por ata i kanë nxitur myslimanët që të shtyjnë përkohësisht përgatitjet për haxhin vjetor.

Ekonomia më e madhe në botë arabe ka mbyllur gjithashtu kinemanë dhe restorante dhe ka ndalur fluturimet ndërsa përpiqet të përmbajë virusin.

Mbreti Salman ka paralajmëruar një luftë “më të vështirë” përpara kundër COVID-19, pasi mbretëria përballet me goditjen e dyfishtë, atë të mbylljeve dhe rënien shumë të madhe të çmimeve të naftës. /Telegrafi/