Andi Mashkulli është nxënës i zellshëm dhe tejet i suksesshëm edhe i Shkollës Digjitale në Prizren.
Para disa ditësh, ai është shpallur fitues i çmimit “ Albanian ICT- Rising star” deri në moshën 16 vjeç me projektin “ Travigo” , në garën më të madhe kombëtare në fushën e Teknologjisë Informative të mbajtur në kryeqytetin e Shqipërisë, Tiranë.
Andi, 15 vjeç, ndjehet tejet i lumtur për “suksesin e arritur mbrëmjen e 11 qershorit në Tiranë, në garën e parë në të cilën kishte aplikuar vetë”.
Andi flet edhe për garën, të cilën e përshkruan si natë me emocione dhe një eksperiencë të mirë për atë, në një kompeticion të fortë.
Për suksesin e arritur, ai thotë se është meritë edhe e stafit të Shkollës Digjitale, për mbështetje dhe përgatitjen e tij sa më të suksesshme për garën në të cilën kërkoheshin njohuri të shumta në fushën e Teknologjisë Informative.
Ai gjithashtu e vlerëson punën që bëhet në këtë institucion të veçantë arsimor, ndërsa tregon se pasionin që ka për këtë fushë do ta vazhdojë edhe në të ardhmen.
I lumtur me suksesin e Andit, ishte edhe përgjegjësi i Shkollës Digjitale, Florian Piraj, i cili tha se “një e arritur e tillë i bën nder shkollës tonë, dhe njëkohësisht tregon edhe punën tonë përplot përkushtim që bëjmë përveç njohurive bazike edhe në ngritjen e kapaciteteve të nxënësve, në fushën e Teknologjisë Informative”. /Telegrafi/
