Xhiroja e së vërtetës
Feronikelin e pret njëri prej dueleve më të rëndësishëm të sezonit, pasi e viziton sot Mitrovicën për t’u përballur me Trepçën ’89 vendëse.
Skuadra nga Drenasi ka epërsi prej 5 pikësh ndaj Prishtinës dhe një fitore eventuale ndaj “Xehetarëve” do ta afronte këtë skuadër edhe më shumë me titullin e kampionit.
Trajneri, Gani Sejdiu, thotë se skuadrës së tij i nevojitet më shumë se maksimumi për të dalë mirë nga Mitrovica dhe për ta bërë një hap tjetër gjigant drejt titullit. Megjithatë, ai është i vetëdijshëm se ekipi i tij nuk ka punë aspak të lehtë ndaj skuadrës së Afrim Tovërlanit.
“E kemi vërtetuar edhe ndaj 89-shit se mund ta mposhtim këtë skuadër, edhe kur ishte ende në garë për titull. Nuk diskutohet se është një ndeshje e vështirë ndaj një kundërshtari mjaft cilësor. Trepça ’89 është e shkarkuar psikikisht dhe luan si vendës, prandaj e ka këtë përparësi. Por, ne e kemi përparësinë e motivit shtesë që e kemi, tek i cili duhet të bazohemi dhe të fokusohemi”, tha trajneri, Gani Sejdiu, për “Zërin”.
“Ne duhet ta japim 200-përqindëshin dhe një fitore eventuale do të na afronte me titullin, pasi kanë mbetur pak lojë. Por, humbja e as barazimi nuk do të na humbnin gjasat, pasi mbesim në vendin e parë”, vazhdoi ai.
Baliqi: Luajmë për fitore
Emin Baliqi, futbollist i Trepçës ’89, siguron se skuadra e tij do të luajë për fitore dhe se nuk i intereson matematika e dikujt tjetër, se a i nevojiten pikët skuadrës kundërshtare.
“Ne gjithmonë e kemi shikuar punën tonë dhe jemi munduar të fitojmë, qoftë në shtëpi apo si mysafirë. Edhe pse i kemi humbur gjasat për titull, do të mundohemi të fitojmë. Ne gjithmonë ua kemi prishur planet skuadrave që e synojnë titullin”, tha Baliqi për gazetën.
Trepça ’89 ka siguruar se nuk do t’ia lëshojë lojën “Niklit”.
Për këtë kishte garantuar për “Zërin” ditë më parë drejtori i klubit mitrovicas, Ilir Bojku, sipas së cilit, 89-shi ua ka prishur llogaritë Prishtinës dhe Besës dhe se do të mundohet ta bëjë një gjë të tillë edhe ndaj Feronikelit.
Ndërkohë, Prishtina do të jetë mysafire e Hajvalisë në kërkim të “hakmarrjes” për humbjen e shkaktuar në ndeshjen e fundit.
“Bardhekaltrit” i duan tri pikët, duke shpresuar që “Nikli” do të kiksojë në Mitrovicë. Kurse, Besa po ashtu llogarit në fitore ndaj Drenicës, por me sytë, mendjen dhe shpresën kah Mitrovica.