Toronto Raptors kampion i NBA për herë të parë në histori të klubit

Liga më e fortë e basketbollit botëror NBA ka kampionin e ri.

Është skuadra kanadeze Toronto Raptors që ka thyer të gjitha parashikimet për ta fituar titullin e sivjetmë.

Raptors kanë shkruar histori, pasi ky është titulli i parë i tyre në NBA.

Të udhëhequr nga Kawhi Leonard, Raptors befasuan kampionin e vitit të kaluar Golden State Warriors duke e mposhtur 4-2, pas gjashtë finaleve spektakolare.

Ndeshja e gjashtë u zhvillua në shtëpinë e Warriors, Oracle Arena, por kjo nuk e pengoi Raptors ta zhvilloj një ndeshje të madhe për ta marrë fitoren me katër pikë diferencë 114:110.

Pascal Siakam dhe Kyle Lowry ishin më të mirët në këtë takim pasi shënuan nga 26 pikë.

Ndërkohë dyshja tjetër, Kawhi Leonard dhe Fred VanVleet kontribuan me nga 22 pikë të tjera.

Klay Thompson me 30 pikë si dhe Andre Igoudala me 22 tjera ishin më efikasit tek Warriors.

Për Toronton kjo ishte arritja e parë në një finale të NBA dhe njëkohësisht triumfi i parë.

Rrugën deri në finale Raptors e kaluan duke eliminuar skuadrat si Orlando Magic, Philadelphia 76ers si dhe Milwaukee Bucks. /Telegrafi/