Shakaja virale me të pastrehë në TikTok, policia amerikane vjen me një paralajmërim

Prej disa kohësh, shumë njerëz kanë përdorur Inteligjencën Artificiale për të krijuar foto të një personi të pastrehë në shtëpinë e tyre dhe për t'ua dërguar prindërve të tyre, gjë që ndonjëherë bën që ata të telefonojnë policinë.

Shakaja u bë virale në TikTok dhe, përveçse shkaktoi ankth tek prindërit, ka shqetësuar edhe policinë.

Pasi përdorin mjetet e Al për të krijuar foto të një burri në shtëpinë e tyre, fëmijët ua dërgojnë ato prindërve të tyre, duke u thënë me shaka se e kanë lejuar të hyjë në shtëpi për të shkuar në banjo, për të fjetur pak ose për të pirë një gotë ujë.

Fëmijët gjithashtu u tregojnë prindërve të tyre se burri i njeh nga puna ose kolegji, pas së cilës prindërit humbasin durimin dhe kërkojnë që fëmijët ta nxjerrin jashtë burrin e pastrehë.

Fëmijët filmojnë gjithçka dhe më pas postojnë reagimet e prindërve të tyre në TikTok, ku disa nga klipet kanë miliona shikime.

Megjithatë, gjërat kthehen nga problematike në potencialisht të rrezikshme kur shakaja zgjat shumë, pasi prindërit telefonojnë policinë.

Thirrjet për vjedhje në shtëpi, veçanërisht ato që përfshijnë fëmijë, trajtohen si një përparësi e lartë nga policia, kështu që shakatë si kjo përdorin burime të vlefshme dhe në fakt mund t'i fusin në telashe ata që bëjnë shaka.

Komandanti i Divizionit të Patrullës së Policisë Round Rock, Andy McKinney, në SHBA, tha se shakatë si kjo mund të shkaktojnë një reagim SWAT.

Departamenti i Policisë së Salem, Massachusetts, lëshoi një deklaratë duke thënë se shakaja çnjerëzore i dehumanizon të pastrehët, shkakton panik dhe shpërdoron burimet e policisë.

Oficerët që thirren për të reaguar nuk e dinë në të vërtetë se kjo është një shaka dhe e trajtojnë telefonatën si një vjedhje të vërtetë, duke krijuar një situatë potencialisht të rrezikshme. /Telegrafi/