Një kompani që prodhoi armën që u përdor gjatë të shtënave më vdekjeprurëse në një shkollë në SHBA, ka arritur marrëveshje me familjet e viktimave për 73 milionë dollarë.
Zgjidhja e Remington Arms vjen si përgjigje ndaj një padie të ngritur nga familjet e nëntë nga 26 viktimat e masakrës së Sandy Hook të vitit 2012.
Rasti shënon herën e parë që një prodhues armësh përballet me përgjegjësi për të shtëna masive, transmeton Telegrafi.
Deri më tani, industria ka gëzuar imunitet nga proceset gjyqësore, raporton bbc.
Çdo familje do të marrë një pjesë të parave, por detaje të tjera të marrëveshjes nuk u zbuluan.
Në fillim të viteve 2000, Shoqata Kombëtare e Armëve dhe grupe të tjera të të drejtave të armëve i shtynë shtetet dhe qeverinë federale të miratojnë ligje për të mbrojtur prodhuesit e armëve nga përgjegjësia financiare për vdekjet që vijnë nga përdorimi i produkteve të tyre. Arritja e tyre kryesore ishte Ligji për Mbrojtjen e Tregtisë së Ligjshme në Armët, i miratuar nga Kongresi dhe i nënshkruar nga presidenti amerikan, George W Bush në 2005.
Ky ligj ka mbrojtur shumë prodhues të armëve nga ekspozimi ligjor, por nuk ishte i mjaftueshëm për të mbrojtur Remington dhe Bushmaster AR-15 të tij, të përdorur nga Adam Lanza për të vrarë 20 fëmijë dhe gjashtë punonjës të shkollës në Newtown, Connecticut.
Korrikun e kaluar, Remington - prodhuesi më i vjetër i armëve në SHBA - ofroi 33 milionë dollarë për për familjet, duke qenë shumë më pak se 225 milionë dollarët që ata kishin kërkuar në gjykatë. Ata e refuzuan ofertën dhe thanë se kishin mbledhur prova të mjaftueshme për të provuar sjelljen e keqe nga Remington.
Remington, e cila u themelua në vitin 1816 dhe është e vendosur në Karolinën e Veriut, ka mohuar akuzat dhe ka pohuar se nuk kishte prova që praktikat e saj të marketingut të kishin lidhje me të shtënat në Sandy Hook.
Pavarësisht vdekjes së fëmijëve të vegjël të moshës gjashtë dhe shtatë vjeç, asnjë ligj i ri kombëtar për kontrollin e armëve nuk u miratua pas të shtënave në Sandy Hook. /Telegrafi/