Putin komenton planin e Trumpit për Ukrainën

Vladimir Putin ka folur në një takim të Këshillit të Sigurisë Ruse këtë pasdite.

Ai tha se Rusia tani ka marrë planin e paqes prej 28 pikash të SHBA-së për luftën në Ukrainë.

Plani mund të shërbejë si "bazë" për një zgjidhje përfundimtare paqësore, por teksti nuk po diskutohet në detaje me Rusinë, sipas Putin.

Ja citimi i plotë i Putinit:

"Ne shohim se pas bisedimeve në Alaska, pati njëfarë pauze nga pala amerikane, dhe e dimë se kjo lidhet me refuzimin aktual të planit të zgjidhjes së paqes nga ana e Ukrainës, të propozuar nga presidenti Trump. Unë besoj se pikërisht për këtë arsye u shfaq një version i ri, në thelb një plan i modernizuar që përbëhet nga 28 pika. Ne e kemi këtë tekst, e morëm përmes kanaleve ekzistuese të ndërveprimit me administratën amerikane. Unë besoj se ai mund të shërbejë gjithashtu si bazë për zgjidhjen përfundimtare të paqes."

Si kujtesë, Rusia e filloi këtë luftë me pushtimin e saj në shkallë të plotë të Ukrainës në shkurt të vitit 2022, pavarësisht pretendimeve të përsëritura se nuk ka ndërmend të sulmojë Ukrainën edhe në ditët para pushtimit.

Presidenti rus tha se plani i paqes i propozuar nga Donald Trump u diskutua përpara se të dy të takoheshin në Alaska në gusht.
"Rusia konfirmoi se ishte dakord me propozimet e SHBA-së për një zgjidhje gjatë takimit në Anchorage", shtoi ai. /Telegrafi/