Punëtorët e kompanisë “Pastrimi” janë duke mbajtur grevë para objektit të Komunës së Prishtinës, duke pozicionuar përballë objektit edhe kamionët për grumbullimin e mbeturinave.
Shoqata Sindikale e “Pastrimit” këtë grevë e ka paralajmëruar duke thënë se qëllimi i saj është shprehja e pakënaqësisë dhe kërkesës për zgjidhje emergjente ndaj situatës së rëndë financiare ku është futur ndërmarrja, “si pasojë e mos-shlyerjes së obligimeve financiare nga Komuna”.
Tutje në njoftim thuhet pjesëmarrës në këtë grevë do të jenë rreth 300 punëtorë dhe të punësuar të KRM “Pastrimi”.
“Vendndodhja: përreth objektit të Komunës së Prishtinës, me qëndrim të vazhdueshëm; Do të përdoren rreth 20 kamionë, të cilët do të parkohen në mënyrë të rregullt dhe pa bllokuar rrugët emergjente; Greva do të jetë paqësore, pa ndërhyrje në veprimtarinë e organeve publike, dhe në koordinim me autoritetet policore”, thuhet në njoftim.
Sipas fotografive të shkrepura nga fotoreporteri Ridvan Slivova, shihet se si kamionët e parkuar kanë krijuar kolona të gjata në trafik. /Telegrafi/
