Ministri i Jashtëm ukrainas, Dmytro Kuleba, ka thënë se “horrorin që e kemi parë në Bucha është vetëm një pjesë e majës së ajsbergut nga të gjitha krimet që i ka kryer ushtria ruse” në Ukrainë deri më tani.
Kuleba këto komente i bëri gjatë një konference për media në Varshavë, ku shtoi se “horrori i Buchas, Mariupolit dhe vendet e tjera”, janë “kërkesë” nga G7 dhe BE-ja që të vendosin sanksione, transmeton Telegrafi.
Duke folur me homologen britanike Lizz Trus, Kuleba ka bërë thirrje për sanksione “më të rënda” kundër Rusisë, derisa ka kërkuar edhe përjashtimin e Rusisë nga Këshilli për të Drejtat e Njeriut pranë Kombeve të Bashkuara.
“Perëndimi vazhdon ta mbushë makinerinë luftarake ruse me pagesat që po i bënë për derivatet fosile, me tregtinë që akoma po ndodh mes Rusisë dhe vendeve perëndimore, me transaksionet financiare pavarësisht që bankat ruse janë shkyçur nga SWIFT-it”, shtoi Kuleba. /Telegrafi/