Aktorja Sarah Paulson në Met Gala-n e këtij viti dëshmoi edhe një herë se tapeti i kuq mund të jetë shumë më tepër se sa thjesht një spektakël mode.
Paraqitja e saj tërhoqi vëmendje të madhe jo vetëm për pamjen e pazakontë, por edhe për mesazhin e fuqishëm që përcolli.
Paulson u shfaq me një fustan voluminoz gri, i firmosur nga brendi avangard Matieres Fecales.
Veshja kishte një siluetë të theksuar, pothuajse 'arkitekturore', me shtresa që krijonin një ndjesi luksi dhe dramë vizuale.
Megjithatë, elementi kyç i paraqitjes ishte aksesori në fytyrë: një maskë në formën e kartëmonedhës një dollarëshe.
Edhe pse kishte hapësira të vogla për të parë, vizualisht maska dukej si pengesë e plotë, duke simbolizuar 'verbërinë' që shkakton paraja.
Si shumë momente provokuese të Met Gala-s, edhe ky shkaktoi reagime të ndara: disa e vlerësuan guximin dhe qasjen artistike, ndërsa të tjerë e kritikuan si të pahijshme, duke përmendur kontradiktën mes mesazhit dhe vetë natyrës së eventit.
Sidoqoftë, pavarësisht opinioneve, një gjë është e sigurt: Sarah Paulson arriti thelbin e Met Gala-s - bashkimin e modës, artit në një moment të vetëm, të paharrueshëm. /Telegrafi/