Presidenti i Interit, Giuseppe Marotta, ishte i ftuar në prezantimin e librit të Stefano Boldrinit "Futbolli i së Ardhmes", ku ai preku një sërë temash aktuale, nga qëndrueshmëria e futbollit, stadiumi i ri dhe përdorimi i algoritmeve, deri te një anekdotë interesante për Cristiano Ronaldon nga ditët e tij duke luajtur për Juventusin. Ai komentoi gjithashtu për Luka Modricin.
Marotta, dikur drejtues i Juventusit, ka dhënë një intervistë për Gazzetta dello Sport, duke folur rreth stadiumit të ri të Interit dhe Milanit, gjendjen e futbollit italian, si dhe rastin e Ronaldos te Juventusi dhe tani të Modricit te Rossonerët.
Italiani komentoi fillimisht për çështjen e stadiumit të ri.
"Do të ndërtojmë një strukturë të re. Do të duhet t'i përgjigjet nevojave të modernitetit në një mënyrë qytetare, etike dhe të qëndrueshme nga ana mjedisore. Jemi ende në fazën burokratike kalimtare, tani do të duhet të vazhdojmë me blerjen e San Siros së vjetër dhe zonave përreth, pastaj do ta nënshkruajmë kontratën në nëntor dhe më në fund do të jemi në gjendje të kalojmë në fazën e plotë të projektimit”, ka thënë fillimisht Marotta.
Ai foli edhe për qëndrueshmërinë e futbollit italian, duke përmendur Luka Modricin si një shembull pozitiv.
"Nuk besoj se është shqetësuese që një 40-vjeçar po luan në këtë nivel këtu, e shoh atë si një reklamë pozitive për futbollin italian. Fëmijët tanë bien në dashuri duke parë një lojtar të tillë".
Megjithatë, ai paralajmëroi për trajektoren në rënie të Serie A.
"Rruga e futbollit tonë është në rënie, sot kampionati ynë është në tranzicion dhe nuk është më El Dorado i viteve 2000. Sot, lojtarët vijnë tek ne në një fazë rënieje", tha ai, duke theksuar hendekun financiar krahasuar me ligat e tjera.
"Të gjitha klubet e mëdha italiane shpenzojnë një maksimum prej 30-35 milionë për një lojtar të lindur në vitet 2004, 2005, 2006. Reali shpenzoi 70 milionë për Mastantuon. Klubet e mëdha të Serie A duhet të përdorin fitimet kapitale për të operuar në treg. Pa to, Milani, Interi dhe Juve nuk do të ishin në gjendje të paraqisnin një buxhet të përshtatshëm. Ky është ndryshimi midis Italisë dhe Anglisë, të drejtat televizive të të cilave jashtë vendit vlejnë katër herë më shumë se tonat. Aspekti ekonomik nuk na jep fuqi konkurruese".
Së fundmi, Marotta foli për metodat moderne të përzgjedhjes së lojtarëve, duke zbuluar një detaj interesant rreth Cristiano Ronaldos.
"Isha me fat që e kisha Cristiano Ronaldon te Juve. Ai ishte ndryshe nga të tjerët sepse madje analizonte shishet e ujit. Shkoi te mjeku dhe pyeti se çfarë kishte brenda, cilat ishin karakteristikat. Nëse ai është ende kampion sot, kjo është për shkak të gjërave të tilla", përfundoi presidenti i Interit. /Telegrafi/