Ka pasur raportime për shpërthime në qytete në anë të tjera të Ukrainës në orët e fundit.
Televizionet dhe mediat ukrainase po raportojnë për shpërthime në Lutsk në veri-perëndim, si dhe në Dnipro - një qytet në brendësi të vendosur në lumin Dnieper dhe një bastion i madh në Ukrainën qendrore-lindore.
Siç raportojnë mediat e huaja, përcjell Telegrafi, asnjë prej këtyre qyteteve nuk ka parë granatime të drejtpërdrejta më parë.
Sirenat e sulmit ajror kishin filluar të binin në disa qytete të Ukrainës në orët para shpërthimeve.
Ndërkohë kryebashkiaku i Lutsk ka konfirmuar se shpërthimet ndodhën pranë aeroportit të qytetit.
"Të gjithë në strehë!", ka shkruar ai në një postim në Facebook ku gjithashtu u ka kërkuar banorëve vendas që të mos publikojnë asnjë foto, adresë apo koordinatë.
Kanali ICTV i Ukrainës citoi raporte se një fabrikë pranë aeroportit ishte aktualisht në flakë.
Në Dnipro, tre shpërthime u raportuan nga mediat ukrainase, ku një me sa duket goditi një fabrikë këpucësh.
Sipas raportimeve, dy shpërthimet e tjera ishin pranë një kopshti fëmijësh dhe një pallati me shumë apartamente.
Ndërkohë janë publikuar imazhe dhe pamje që tregojnë shkallën e shkatërrimit ndërsa zjarrfikësit luftojnë për të shuar zjarret e furishme mes rrënojave të goditjes.
Të paktën një person është raportuar i vdekur në Dnipro deri më tani, sipas Shërbimeve Shtetërore të Emergjencave të Ukrainës. /Telegrafi/