Mohamed Salah mbetet një nga objektivat kryesorë të klubeve të Superligës së Arabisë Saudite, pavarësisht se sezonin e kaluar firmosi një kontratë të re dyvjeçare me Liverpoolin, pasi më herët kishte refuzuar oferta gjigante prej miliona eurosh nga Lindja e Mesme.
33-vjeçari egjiptian po has vështirësi të përsërisë formën e shkëlqyer të sezonit të kaluar, ndërsa së fundmi u la në stol në fitoren 2-0 të Liverpoolit ndaj West Ham.
Burime pranë afatit kalimtar saudit bëjnë të ditur se drejtuesit e klubeve mbeten të vendosur për ta transferuar yllin afrikan, me Al Hilal që kryeson garën dhe Al-Qadsiah që shfaq interes konkret.
Kjo situatë rrit gjasat që një lëvizje e mundshme të rikthehet në qendër të vëmendjes në verën e vitit 2026, sidomos nëse forma e Salah vazhdon të luhatet nën kërkesat taktike të trajnerit Arne Slot.
Sezonin e kaluar, Salah ishte vendimtar me 29 gola dhe 18 asistime në 38 ndeshje të Ligës Premier, duke udhëhequr Liverpoolin drejt titullit. /Telegrafi/