Milani po përballet me konkurrencë të ashpër për transferimin e Ardon Jasharit nga Borussia Dortmund, ndërkohë që Club Brugge vazhdon të qëndrojë e vendosur për të mos e shitur lojtarin.
Sipas ekspertit zviceran, Sacha Tavolieri, skuadra gjermane është tani gati të paraqesë një ofertë të rëndësishme për Jasharin.
Borussia Dortmund e ka ndjekur mesfushorin që më herët gjatë verës, por duhej më parë të realizonte disa shitje, diçka që është bërë e mundur tani pas largimit të Jamie Gittens drejt Chelseat për 65 milionë euro.
Jashari është një objektiv i konfirmuar për këtë afat kalimtar dhe ka qenë tifoz i Milanit që në fëmijëri, ndaj është shumë i interesuar për këtë transferim.
Megjithatë, ai është i vetëdijshëm se Club Brugge duhet të pranojë një ofertë, gjë që deri tani nuk ka ndodhur pasi klubi nuk ka qenë i gatshëm të ulet në negociata.
Gjithsesi, raportet nga Italia janë optimiste se një marrëveshje mund të arrihet për rreth 35 milionë euro, një shumë që Borussia Dortmund duket e gatshme ta ofrojë më shpejt se Milani.
22-vjeçari ishte blerë vetëm verën e kaluar nga Luzern për gjashtë milionë euro dhe që atëherë vlera e tij në treg është rritur ndjeshëm./Telegrafi/