Ish-drejtori i Leeds United, David Haigh, thotë se së paku 20 lojtarë të Ligës Premier dhe të ligës Championship janë homoseksuale, mirëpo kanë frikë ta thonë të vërtetën.
Ai beson se nëse ata do ta pranonin seksualitetin e tyre publikisht si grup, atëherë tifozët do t’i pranonin.
Haigh para shumë vitesh ka pranuar se është homoseksual dhe ka thënë se kur ishte i angazhuar te Leeds (2013-2014), atij i janë rrëfyer shumë futbollistë homoseksualë.
“Sipas meje 20 është numri i saktë, edhe pse mund të jetë më i madh. Ata akoma luajnë, në Ligën Premier dhe në Championship, mirëpo unë nuk do të përmend emra, sepse kjo nuk do t’i ndihmonte askujt”.
“Futbollistët e rinj i reklamojnë brendet e sponsorëve dhe duke qenë homoseksualë, kjo akoma konsiderohet si një hendikep”.
“Po të mësoheshin përnjëherë për seksualitetin e tyre, kjo nuk do të pranohej mirë. Mirëpo, futbolli ka nevojë që ata të dalin publikisht. Ata që do ta bënin do të ishin të guximshëm – por, njëherësh do të merrnin edhe shumë mbështetje”, ka deklaruar Haigh.
Lojtari i fundit që doli publikisht në vitet e nëntëdhjeta, Justin Fashanu, iu nënshtrua një abuzimi të madh. Mirëpo, Haigh beson se gjërat kanë ndryshuar shumë që atëherë. /Telegrafi/