Një person i cili u plagos sot rreth orës 11:00 nga të shtënat me armë zjarri në lagjen Dardania në Prishtinë është në gjendje të rëndë.
Lajmin për Telegrafin e konfirmoi drejtori i Klinikës Emergjente në Qendrën Klinike Universitare të Kosovës (QKUK), Naser Syla.
“Është pranuar një pacient i plagosur me armë zjarri, gjendja e tij është e rëndë”, ka thënë Syla.
Nga Policia e Kosovës, zëdhënësja Flora Ahmeti për Telegrafin tha se një person është plagosur sot rreth orës 11:00 nga të shtëna me armë zjarri në lagjen Dardania në Prishtinë.
Sipas saj, viktima është dërguar për tretman mjekësor.
“Sot rreth orës 11:00, policia ka marrë informatën për të shtëna me armë zjarri në lagjen Dardania në Prishtinë.
Menjëherë pas marrjes së informatës policia ka dalë në vendin e ngjarjes dhe ka ndërmarrë të gjitha veprimet e nevojshme që konsistojnë në hetimin e rrethanave që karakterizojnë ngjarjen.
Bazuar në të dhënat fillestare dyshohet se nga një person është plagosur dhe i njëjti është dërguar për tretman mjekësor”, ka thënë Ahmeti.
Po ashtu siç bëri të ditur ajo hetuesit policor në koordinim me prokurorinë, po ndërmarrin veprimet hetimore për arrestimin e personit të dyshuar ( i cili është identifikuar) si dhe ndriçimin e plotë të rastit. /Telegrafi/