Franca këndellet pas humbjes ndaj Italisë, mposht Belgjikën në shtëpi

Franca ka lënë prapa krahëve humbjen ndaj Italisë duke mposhtur para tifozëve të saj Belgjikën me rezultat të pastër 2-0 në kuadër të Ligës së Kombeve.

Për epërsinë e francezëve në këtë takim u përkujdes Randal Kolo Muani i cili në minutën e 29-të shënoi për 1-0 pas një topi të kthyer brenda zonës.

Me epërsi minimale të Francës u mbyllën 45 minutat e para të këtij takimi.

Në pjesën e dytë ‘Gjelat’ arritën ta shënojnë edhe golin e dytë apo të qetësisë, për t’u rikthyer kështu tek rezultatet pozitive.

Ishte Ousmane Dembele ai i cili në minutën e 57-të pranoi një top të mirë nga N’Golo Kante për të shënuar një gol të bukur për rezultatin 2-0.

Të besuarit e Didier Deschamps nuk u ndalën më kaq dhe kërkuan edhe më shumë gola.

Kylian Mbappe i cili u inkuadrua në pjesën e dytë, pati dy raste të mira shënimi, por Koen Casteels nuk lejoi që të mposhtej.

Me këtë fitore Franca ngjitet në pozitën e dytë me tri pikë po aq sa ka edhe Belgjika në vendin e tretë, ndërsa lider i grupit mbetet Italia me gjashtë pikë të fituara./Telegrafi/