Një 8-vjeçar ishte shpallur i humbur natën e kaluar, duke alarmuar familjen e tij, e cila kërkoi ndihmë për ta gjetur.
Pas disa orësh kërkimi, falë bashkëpunimit të Shoqatës për Kërkim-Shpëtim, Policisë së Kosovës, FSK-së dhe mobilizimit masiv të qytetarëve, fëmija u gjet i shëndoshë dhe mirë.
Nënkryetari i Shoqatës për Kërkim-Shpëtim, Mentor Maloku, tha se në raste të tilla aktivizohen të gjitha kapacitetet e shoqatës.
“Në raste të tilla, sidomos kur bëhet fjalë për fëmijë, i mobilizojmë të gjitha resurset tona. Brenda 40 minutash u mblodhëm 25 anëtarë dhe u nisëm drejt Gjilanit”, tha Maloku për Klan Kosova.
Ai tregoi se pas një mbledhjeje të shpejtë, u përcaktuan hapat që do të ndiqeshin gjatë operacionit të kërkimit. Fillimisht, kërkimet u kryen me dron termal për të identifikuar ndonjë lëvizje, dhe më pas u vazhdua me kërkim fushor.
“Kemi pasur një bashkëpunim shumë të mirë me Policinë, ndërsa edhe FSK-ja ishte e pranishme në terren”, shtoi Maloku.
Në fund, ai dhe familjarët e 8-vjeçarit konfirmuan se fëmija u gjet shëndoshë e mirë, në një shtëpi të pabanuar, jo shumë larg shtëpisë së tij. /Telegrafi/