Ish-presidenti i Real Madridit, Ramon Calderon ka thënë se Zinedine Zidane u largua nga Mbretërit sepse ai donte të shiste Gareth Bale në vend të Cristiano Ronaldos.
Vendimi i Zidane për t'u larguar në fund të sezonit të kaluar pas trofeut të tretë radhazi të Ligës së Kampionëve, habiti shumë.
Ai largim u pasua disa javë më vonë me transferimin e Ronaldos prej 100 milionë eurosh te Juventusi dhe duket se të dy ishin të lidhur.
Sipas ish-presidentit të Real Madridit, Calderon, largimi i Zidane erdhi pasi francezi donte të shiste Balen dhe jo Ronaldon.
"Zidane këmbënguli në mbajtjen e Cristianos dhe shitjen e Bale", ka thënë fillimisht Calderon për gazetën AS.
"Në vend të kësaj, Perez bëri të kundërtën".
"Zidane donte të kishte fuqi vendimmarrëse në nënshkrimin dhe shitjen e lojtarëve, por sugjerimet e tij u injoruan, kështu që ai vendosi të largohet".
"Zidane mori vendimin e duhur", përfundoi ish-presidenti i Real Madridit. /Telegrafi/