Bolaris: Mund të gjendet zgjidhje edhe për çështjen e kishës në Shkup

"Me negociata dhe bisedime në të cilat do të merrnin pjesë edhe patriakana serbe dhe ajo ekumike, mund të gjendet zgjidhje edhe për kishën në Shkup".

Kështu deklaron zv.ministri i Punëve të Jashtme i Greqisë, Markos Bolaris, në një intervistë për televizionin grek "ERT", përcjell Telegrafi Maqedoni nga AIM.

"Mendoj se edhe për kishën që ekziston në Shkup, e cila ishte nën historinë e Kryepeshkopisë së Ohrit, me bisedime dhe negociata që do të jenë në nivel të kishës, mund të gjendet zgjidhje, jam i sigurt. Nga momenti kur u ndërpre propaganda, anti-shkencorja dhe anti-grekja, janë hapur rrugë edhe për këtë popull që të integrohet në BE dhe të jetë partneri ynë në NATO", thotë Bolaris.

Zëvendësministri i Punëve të Jashtme të Greqisë, i cili njëherit e kryesoi ekipin grek në Komitetin e librave, në intervistën thotë se problemi në të kaluarën për të cilin Greqia ishte e zemëruar “ishte provokimi dhe sfidimi i objektivitetit të historisë dhe propagandës joshkencore, johistorike dhe joakademike e cila ishte shkaku kryesor për tensionin i cili ekzistonte mes të dyja vendeve dhe mes të dy popujve”.

“Nga momenti kur ky popull në Shkup heq dorë nga propaganda e cila është në dëm tonin është absolutisht e qartë se hapen perspektiva të reja që të mundemi të bisedojmë me ta, të bashkëpunojmë me ta në nivel të popujve krishterë ortodoksë”, thotë zëvendës shefi i diplomacisë greke./Telegrafi/