Këngëtari i njohur Akon është bërë pjesë e debatit publik pasi e goditi me shuplakë rojen e tij të sigurisë përpara fansave gjatë një performance këtë javë në Rusi.
52-vjeçari u pa në një video të publikuar në rrjete sociale teksa përpiqej ta hipte mbi shpatullat e rojes sikur po drejtonte një kalë, shkruan DailyMail.
Ngjarja ndodhi ndërsa ai po performonte hitin e vitit 2009, "Sexy Chick", ku pas hedhjes nga skena u ngjit mbi supet e rojes dhe filloi ta godiste me shuplakë në ballë ndërkohë që kalonte përpara turmës.
Përdoruesit e platformës Reddit e cilësuan këtë veprim “çnjerëzor dhe mosrespektues”. Një komentues shkroi: “Çfarë lloj njeriu duhet të jesh për ta trajtuar një tjetër kështu? Dhe të mendosh se je më i mirë se të tjerët vetëm pse këndon për të jetuar”.
Një tjetër shtoi: “Vetëm pse dikush punon për ty nuk të jep të drejtën ta trajtosh keq. Po të isha unë roja, do ta kisha lënë aty ku ishte!”.
Ky incident ndodhi në një kohë kur mediat raportuan se planet madhështore të Akon për të ndërtuar një qytet futuristik me vlerë 4.3 miliardë funte (4.9 miliardë euro) në Senegal janë zyrtarisht anuluar, pesë vite pas premtimit për ta kthyer një bregdet të largët të Afrikës Perëndimore në një “Wakanda” të vërtetë.
Qeveria senegaleze konfirmoi në korrik se projekti i “Akon City” nuk ekziston më. Serigne Mamadou, përgjegjës i trupës kombëtare të zhvillimit të turizmit në Senegal (Sapco), i tha BBC-së: “Projekti ‘Akon City’ nuk ekziston më. Fatmirësisht, kemi arritur një marrëveshje me Alioune Badara Thiam [Akon], për një projekt më realist, të cilin Sapco do ta mbështesë plotësisht”.
Në vitin 2018, Akon kishte zbuluar idenë për të ndërtuar qytetin e tij futuristik në Senegal, me një kriptomonedhë të quajtur AKoin. Plani përfshinte universitete, shkolla, stadium sportiv dhe një aeroport ndërkombëtar, në një sipërfaqe prej 2,000 hektarësh pranë kryeqytetit Dakar. Qyteti do të ishte “100% i bazuar në kriptomonedhë”, duke e vendosur AKoin në qendër të jetës ekonomike.
Presidenti i Senegalit, Macky Sall, i kishte dhënë tokën për projektin, që ndodhej vetëm 5 minuta nga aeroporti i ri ndërkombëtar dhe pranë bregdetit. Sipas përshkrimit zyrtar, qyteti do të ofronte mundësi për biznese, marka dhe individë të njohur që kërkonin të krijonin përvoja unike në një mjedis futuristik.
Akon ka qenë gjithashtu themelues i projektit Lighting Africa, që synonte të siguronte energji diellore për kontinentin afrikan. Ai u bë i famshëm ndërkombëtarisht në vitin 2004 me albumin e tij debutues dhe hitet si Locked Up dhe Smack That. Megjithatë, vitet e fundit suksesi i tij muzikor ka qenë më i zbehtë krahasuar me fillimin e karrierës. /Telegrafi/
