AKB: Në pandemi u shuan 20 mijë biznese, e rreth 50 mijë persona mbeten pa punë

Aleanca Kosovare e Bizneseve (AKB) ka publikuar një studimin hulumtues të trendit të ndërmarrësisë në periudhën 2020 – 2022, me ç’rast u publikuan edhe të dhëna sesa biznese pushuan aktivitetin ekonomik në këtë periudhë.

Kryetari i AKB-së, Agim Shahini tha se rezultatet e këtij studimi kanë pasqyruar një realitet jo të mirë për bizneset dhe ekonominë e Kosovës duke pasqyruar një trend të rritjes së mbylljes së bizneseve.

Ai theksoi se gjatë vitit 2020, gjatë pandemisë, janë mbyllur 20 mijë biznese e kanë mbetur pa punë më shumë se 50 mijë punëtorë, raporton Ekonomia Online.

“Aleanca Kosovare e Bizneseve e ka bërë këtë studim me qëllim që të nxjerrë të dhënat se çfarë trendi është zhvilluar ndërmarrësia në Republikës e Kosovës për tri vitet e kaluara. Rezultatet e këtij studimi kanë pasqyruar një realitet jo të mirë për bizneset dhe ekonominë e Kosovës duke pasqyruar një trend të rritjes të mbylljes së bizneseve”, tha ai.

Sipas tij, ndërmarrësit në Kosovë ishin në gjendje jo të mirë dhe kjo gjendje për fat të keq po e përcjell biznesin për një kohë të gjatë duke filluar nga pandemia COVID-19 pastaj nga kriza globale e sidomos të vitit të fundit 2022 si rezultat i luftës në Ukrainë dhe Rusi.

“Nga analizat e bëra na shqetësoj fakti se trendi negativ për bizneset ka qenë në vazhdimësi që nga paslufta, por me theks të veçantë nga viti 2020 e këndej. Kurse ky trend është prezent shumë në vitin 2020 si rezultat total i mbylljes të ekonomisë dhe bizneseve të qarkullimit në këtë kohë që ishte pandemia. Në vitin 2020 vit i pandemisë. Në këtë vit bizneset u mbyllën, u shuan e pushuan një numër i madh i tyre dhe falimentuan  me numër rekord rreth 20 mijë sosh”, tha ai.

“Pandemia ka mbyllur shumë biznese por edhe ka lënë të pa punë shumë punëtorë rreth 50 mijë. Në këtë vit do të mbahet mend si vit i mbylljes dhe shuarjeve masive të bizneseve në dy dekadat e fundit ku vetëm 9794 biznese u regjistruan të reja kundrejt 20 mijë që u mbyllën”.

Avokati Arianit Koci, tha se me mbylljen e bizneseve shumë familje kanë mbetur pa punë.

“Mbyllja e një biznesi do të thotë edhe mbetje pa punë për shumë familje nëse përafërsisht një kompani në Kosovë ka së paku dy punëtorë”.

Ai tha më tej se mbyllja e bizneseve theksoi se është humbje edhe për shtetin.