AGK: Të shqetësuar me rastin e gjetjes së pajisjes gjurmuese në veturën e Vehbi Kajtazit

Asociacioni i Gazetarëve të Kosovës (AGK) ka reaguar pas zbulimit të një pajisjeje gjurmuese të fshehur në veturën e gazetarit kosovar, Vehbi Kajtazi.

AGK ka bërë thirrje të menjëhershme që autoritetet e sigurisë të ndërmarrin një hetim të plotë dhe transparent, për të zbardhur rrethanat që kanë çuar në vendosjen e pajisjes gjurmuese.

“Asociacioni i Gazetarëve të Kosovës shpreh shqetësim për rastin e gjetjes së një pajisjeje gjurmuese në veturën e gazetarit kosovar, Vehbi Kajtazi.

Duke e konsideruar si një rast të paprecedentë, AGK bën thirrje që autoritetet e sigurisë të hetojnë rastin në detaje dhe të zbardhin sa më shpejt rrethanat e kësaj ngjarjeje.

AGK do të përcjellë me vëmendje zhvillimet lidhur me rastin në fjalë, deri në sqarimin e tij të plotë nga autoritetet e sigurisë së Republikës së Kosovës”, thuhet në reagimin e AGK-së.

Pasi u zbulua një “pajisje e dyshimtë” në veturën e tij, gazetari Vehbi Kajtazi ka reaguar duke thënë se nuk ndjehet i sigurt.

Pajisja e dyshimtë që u zbulua në veturën e Kajtazit, sipas Policisë, dyshohet se është GPS (Sistemi Global i Pozicionimit), pajisje që tregon vendndodhje.

Kajtazi ka kërkuar që të vërtetohet se kujt i përket pajisja e dyshimtë dhe kush e ka vendosur atë në veturën e tij. /Telegrafi/