AGK në Ditën Ndërkombëtare të Lirisë së Shtypit: Të respektohet puna e gazetarëve në Kosovë

Asociacioni i Gazetarëve të Kosovës sot po shënon Ditën Ndërkombëtare të Lirisë së Shtypit me moton “Mediat nuk janë armiku”, ndërkaq kryetari i Bordit, Xhemajl Rexha theksoi se sulmet e vazhdueshme dhe të orkestruara nga pushteti aktual, shpesh herë të bëra me gjuhë politikisht në rregull, janë duke e degraduar profesionin e gazetarit si asnjëherë më parë.

Rexha kërkoi që njerëzit në pushtet të respektojnë punën e gazetarit, raporton Telegrafi.

“Me moton ‘mediat nuk janë armiku’, roli i medias mbetet po aq vital ndër vite. Media ka luajtur një rol të rëndësishëm në vend. Ndodh rrallë që politikanët të jenë të kënaqur me raportet me mediat dhe gazetarët nuk presin një gjë të tillë. Por ajo që presin është që njerëzit në pushtet të njohin rolin dhe profesionin e gazetarit dhe ta respektojnë atë. Sulmet e vazhdueshme dhe të orkestruara nga pushteti aktual, shpesh herë të bëra me gjuhë politikisht në rregull, janë duke e degraduar profesionin e gazetarit si asnjëherë më parë. Kjo sjellje në kombinim me mbylljen e institucioneve dhe transparencën që ka mbizotëruar gjatë tërë vitit të kaluar e bën punën e gazetarit shumë të vështirë. Tentativa e politikanëve që skandalet të fshihen duke sulmuar gazetarët me narrativën e  mirë orkestruar që ‘ata shpifin, mos ju besoni’, është e rrezikshme dhe i bën gazetarët të duken armiku i vendit. Kur kjo narrativë bëhet e përditshme atëherë ajo përbën direkt rrezik për sigurinë e gazetarëve”, ka thënë Rexha.

Lexo po ashtu Përmirësohet liria e mediave në Kosovë, megjithatë mbetet në mesin e vendeve me “situatë problematike"

Ai po ashtu tha se duhet të përdoret ambienti i të bërit gazetari.

“Në vend të nxitjes së urrejtjes ndaj gazetarëve, fuqia politike e pushtetarëve sot duhet të përdoret për të përmirësuar ambientin e të bërit gazetari duke adresuar fillimisht të gjitha kritikat që janë dhënë nga raporte kredibile ndërkombëtare”, vijoi ai.

Rexha tutje shtoi “Në Ditën Ndërkombëtare të Lirisë së Shtypit, AGK-ja kërkuar që politikanët të ndalin menjëherë bojkotimin e mediave, të japin llogari rregullisht, të respektojnë legjislacionin për qasje në dokumente publike, të mos sulmojnë apo nxisin urrejtje ndaj gazetarëve dhe të krijojnë kushte për luftimin efektiv të pandëshkueshmërisë së sulmeve ndaj gazetarëve. Mediat nuk janë armiku”. /Telegrafi/