Asociacioni i Gazetarëve të Kosovës e ka dënuar sjelljen e ministrit të Punëve të Brendshme, Xhelal Sveçla, në konferencën për shtyp të mbajtur sot, lidhur me zhvillimet e fundit në veri të vendit.
Ministri Sveçla i ka quajtur “budallallëqe” pyetjet e gazetares, Besarta Hoti, të portalit “Periskopi”, e cila e ka pyetur për punësimin e motrës së tij, në Ministrinë e Bujqësisë në Qeverinë e Kosovës.
Sipas AGK-së, sjellja e Sveçlës është joprofesionale për postin që mbanë dhe gjithashtu ka konotacione seksiste.
“Përgjigja e tij ka nxitur një varg reagimesh linçuese online që e kanë targetuar gazetaren. AGK-ja konsideron se gazetarët janë të lirë të pyesin çdo lloj pyetje në interes publik, pavarësisht temës qendrore të konferencës. Për më tepër, MPB-ja sikurse ministri të tjera të qeverisë nuk kthejnë përgjigje shumicën e kohës në pyetjet e mediave”, thuhet në reagimin e kësaj organizate./Telegrafi/
