Abdixhiku: Kërkimi i listave të grevistëve, kërcënim ndaj proceseve demokratike dhe vet shtetit juridik

Kryetari i LDK-së, Lumir Abdixhiku ka reaguar ashpër pas paralajmërimeve nga Qeveria se punëtorët që futen në grevë do të penalizohen në paga.

I pari i LDK-së thotë se Qeveria në vend të dinjitetit, punëtorëve po iu bënë kërcënime.

Ai thotë se kërkimi i listave të grevistëve është kërcënim ndaj proceseve demokratike në vend dhe vet shtetit juridik.

“Ky është narracioni i një pushteti autokratik që deri dje premtoi mirëqenie e zhvillim, sot shpërndanë frikë e kërcënim. Kërkimi i listave të punonjësve në grevë nga ana e Qeverisë përveçse presion i drejtpërdrejtë ndaj punëtorëve të sektorit publik është dhe kërcënim ndaj proceseve demokratike në vend dhe vet shtetit juridik”, ka shkruar Abdixhiku, përcjell Telegrafi.

Opozitari thotë se shoqëria kosovare duhet të rreshtohet prapa mësuesve, mjekëve e shërbyesve publik që sipas tij me plot të drejtë, në krizën më të madhe ekonomike, kërkojnë dialog, dinjitet e përballueshmëri.

Lexo po ashtu Greva në sektorin publik - Ministria e Financave, grevistëve: Do t'ua ndërprejmë pagën

“Këtë përballueshmëri ata se gjejnë dot. Ata kanë gjetur një kryeministër që me frikë e kërcënim, provon t’i mbulojë të gjitha dështimet e tij. Ndërprerja e kontratave të tyre, në këtë kohë krize, është goditja më e rëndë që një Qeveri mund t’u japë qytetarëve të vet. Kështu nuk duhet të duket Kosova demokratike, kështu nuk duhet të trajtohen punëtorët tanë. Kryeministri i premtimeve, që sot s’mund ta mbajë asnjë, po dëshmon, si çdo ditë, që është i paaftë për të menaxhuar me vendin, kërkesat qytetare e krizat e mëdha”, ka shkruar tutje Abdixhiku.

Ndryshe, sot sektori publik në Kosovë nga sot ka nisur grevën e përgjithshme, pasi që sindikalistët nuk kanë arritur të bien dakord me Qeverinë e Kosovës rreth kërkesës së tyre për mbështetje prej 100 eurove.

E pas fillimit të grevës, Ministria e Financave ka kërkuar nga Këshilli Grevist listën e personave që po marrin pjesë në grevë për t’ua ndalur pagën sipas neni 18 të Ligjit për Greva./Telegrafi/