Zyba dhe Neziri të bindur në paraqitje të mirë ndaj Anglisë U21

Kosova U21 po i vazhdon përgatitjet me intensitet dhe me entuziazëm për ndeshjen e radhës kundër Anglisë U21, që zhvillohet të premten në stadiumin “Fadil Vokrri”.

Në ndeshjen e parë kundër Anglisë në kuadër të kualifikimeve për Euro 2023, Dardanët e rinj kishin pësuar humbje 2:0.

Mesfushori Qëndrim Zyba ka folur për përshtypjet e tij nga fitorja me Andorrën, si dhe motivin për ballafaqimin me anglezët.

“Ka qenë një ndeshje jo e lehtë, sepse Andorra u mbrojt me shumë futbollistë, por ne dhamë maksimumin për t’i marrë tri pikë dhe ishte ndjenjë shumë e mirë kur fituam. Tani, patjetër se Anglia është një superkombëtare, por ne besojmë se harmonia që kemi në grup të na e sjellë një rezultat pozitiv. Nuk ia kemi frikën kësaj përballjeje, ngase ne duhet ta përfaqësojmë vendin tonë në mënyrën më të mirë të mundshme dhe pse jo edhe të bëjmë befasi. Ju bëj thirrje tifozëve ‘Dardanët’ që të jenë në numër sa më të madh prezent për të na mbështetur në këtë ndeshje të vështirë”, ka thënë Zyba.

Optimist për paraqitje të mirë është shprehur edhe Behar Neziri, e këtë ai e bazon në lojën e mirë kundër Andorrës.

“Fitorja atje na ka mundësuar që të jemi më të çliruar për ndeshjen kundër Anglisë. E dimë që tani kemi përball një rival shumë të fortë, por edhe ne kemi treguar se kemi potencial. Besoj se jemi rritur si grup”.

“Atmosfera është shumë e mirë dhe motivi tash është shumë më i madh dhe shpresoj se mund të marrim së paku një pikë. Ne e kemi dëshirë që të premten të vijnë sa më shumë tifozë në stadium sepse kjo do të na ndihmojë”, ka theksuar Neziri.

Ata aktualisht renditen në pozitën e tretë me 11 pikë, derisa Anglia kryeson me 22 pikë.

Ndeshja Kosovë U21 – Angli U21, zhvillohet të premten, në orën 20:00 në stadiumin “Fadil Vokrri” dhe hyrja për të gjithë tifozët është falas. /Telegrafi/