Zgjedhjet lokale në Maqedoni do të shpallen në fund të korrikut ose fillim të gushtit

Kryetari i Kuvendit Talat Xhaferi, në fund të korrikut ose në fillim të gushtit do t’i shpallë zgjedhjet lokale, të cilat duhet të mbahen në gjysmën e dytë të muajit tetor.

Xhaferi tha se kjo do të varet nga informacionet se kur përfundon mandati i kryetarëve të komunave, përcjell Telegrafi Maqedoni.

Në takimin e sotëm me gazetarët, Xhaferi tha se nuk do të lejojë hapësirë që dikush të shfrytëzojë aspekte formale dhe të vendoset në pikëpyetje gjithë procesi zgjedhor.

Xhaferi tha se nëse zgjedhjet lokale mbahen më 17 tetor, atëherë fushata zgjedhore do të përkonte për disa ditë me regjistrimin e popullsisë, i cili duhet të përfundojë me 30 shtator.

“Kur të vijë koha do të dërgojë letër në KSHZ në lidhje me afatet dhe mandatet”, tha Xhaferi.

Ndryshe, ai foli edhe për negociatat me Bullgarinë dhe nëse Kuvendi mund të përfshihet në ndonjë mënyrë në këtë proces, me çrast tha se Kuvendi i RMV-së e ka ratifikuar Marrëveshjen me Bullgarinë dhe se qeveritë janë ata që negociojnë për këtë çështje./Telegrafi/