Zëvendësministri Çelaj takohet me ndihmësministrin kroat Papa: Kroacia përkrah objektivat integruese të Kosovës

Zëvendës ministri i Integrimeve Evropian, Lirak Çelaj, ështa takuar sot me Miroslav Papa, ndihmës Ministrin e Kroacisë për Punë të Jashtme dhe Çështje Evropiane si dhe Antun Herceg, përgjegjës për vendet kandidate në BE të kësaj ministrie, me ç’rast diskutoi për mundësitë për bashkëpunim përgjatë procesit të integrimit në BE.

“Ne vlerësojmë se rruga e vetme për të ardhmen tonë të sigurt, është integrimi evropian. Ne jemi të angazhuar që plani për zgjerim të BE-së, në gjashtë vendet e Ballkanit perëndimor të arrihet sa më parë. Ne kemi dëshmuar gatishmërinë tonë që të gjitha obligimet ndërkombëtare do t’i zbatojmë, po ashtu, do të kontribuojmë në paqen rajonale”, potencoi Çelaj, duke shtuar se rajoni duhet të marrë vëmendjen e duhur nga BE-ja.

Sipas njoftimit, Çelaj ka thënë se Kosova nga vendet e BE-së, pret përkrahje gjatë vlerësimit të procesit jo vetëm për liberalizimin e vizave por edhe të arriturave tjera duke pasur qasje të njëjtë sikur me vendet e deritashme aspirantë në proces.

Ai shtoi se Kosova çmon përkrahjen nga Kroacia rreth proceseve integruese euro-atlantike.

Ndërsa Miroslav Papa, ndihmës ministër i Punëve të jashtme dhe Çështjeve Evropiane, vlerësoi të arriturat e Kosovës duke potencuar se Kroacia do të vazhdojë mbështetjen ndaj Kosovës drejt integrimit evropian. Po ashtu, ai ofroi përkrahjen e ekspertëve për këtë proces dhe përvojat e këtij vendi mik të Kosovës.

Sipas njoftimit marrëdhëniet ndërshtetërore, u vlerësua në takim, janë të shkëlqyera, nëpërmjet proceseve integruese, ato do të fuqizohen edhe më tej, duke këmbyer përvoja nga procesi si dhe përkrahje të gjithanshme për Kosovën nga Kroacia edhe pranë institucioneve ndërkombëtare./Telegrafi/