Zelensky: NATO duhet ta ftojë në tërësi Ukrainën, por aleanca mund të mos e mbrojë të gjithë territorin

Ftesa për NATO-n duhet të jetë për gjithë Ukrainën, por mbrojtja e aleancës mund të mos mbulojë të gjitha territoret, deklaroi presidenti ukrainas, Volodymyr Zelensky, duke theksuar rëndësinë e integrimit të vendit në aleancën më të fuqishme ushtarake në botë.

“Ne e dimë që gjatë luftës nuk do të pranohemi në NATO. Por, nëse duam t’i japim fund vërtet luftës, NATO duhet t’i ofrohet Ukrainës. Ftesa duhet t’i drejtohet gjithë Ukrainës brenda kufijve të saj të njohur ndërkombëtarisht. Nuk ka asgjë më shumë për të diskutuar këtu”, tha lideri ukrainas në një intervistë për CBN News, duke nënvizuar se ky është një hap thelbësor për të garantuar sigurinë e Ukrainës dhe stabilitetin në rajon.

Zelensky argumentoi se ky proces nuk është vetëm një çështje politike, por edhe një detyrim ligjor që buron nga Kushtetuta e Ukrainës dhe normat e së drejtës ndërkombëtare. Ai theksoi se këto parime nuk mund të anashkalohen apo të shkelën, pavarësisht sfidave të luftës dhe presioneve ndërkombëtare.

“Por, mbrojtja e NATO-s mund të zbatohet fillimisht për pjesën që Ukraina kontrollon aktualisht dhe më pas të zgjerohet në të ardhmen”, shtoi ai, duke sugjeruar një qasje graduale dhe pragmatike për integrimin e vendit në sistemin mbrojtës të aleancës.

Sipas tij, ky mekanizëm mund të ndihmojë në mbrojtjen e popullit ukrainas dhe në parandalimin e eskalimit të mëtejshëm të konfliktit.

Presidenti ukrainas theksoi gjithashtu se një ftesë për NATO-n nuk do të ishte vetëm një mesazh mbështetjeje për Ukrainën, por edhe një sinjal i fuqishëm për botën, që tregonte vendosmërinë e aleancës për të mbrojtur parimet e sovranitetit dhe integritetit territorial të çdo vendi. Ai paralajmëroi se mosveprimi në këtë drejtim mund të inkurajonte agresionin e mëtejshëm dhe të dobësonte sigurinë ndërkombëtare.

Kjo deklaratë vjen në një moment kritik për Ukrainën, e cila vazhdon të përballet me sfidat e një lufte shkatërruese dhe përpjekjet për të siguruar mbështetje ndërkombëtare në luftën e saj për pavarësi dhe paqe. /Telegrafi/