Zaev: Më 20 ose 21 nëntor takim mes Nimetz dhe negociuesve

Kryeministri i Maqedonisë Zoran Zaev pret më 20 apo 21 nëntor të mbahet takimi i parë midis negociuesve nga Maqedonia dhe Greqia me ndërmjetësin e Kombeve të Bashkuara në zgjidhjen e kontestit të emrit, Methew Nimetz.

Këtë e deklaroi duke iu përgjigjur pyetjes së gazetarëve pas takimit me kryeministrin slloven, Miro Cerar. Zaev foli për zhvillimin e mëtejmë të integrimeve evropiane dhe euroatlantike të Maqedonisë, me ç’rast përmendi se në këtë drejtim para së gjithash fokusi vihet në zgjidhjen e kontestit me Greqinë, përcjell Telegrafi Maqedoni.

“Kjo është çështje megjithatë aktuale edhe në Maqedoni. E logjikshme ishte që pas përfundimit të zgjedhjeve lokale të bëhet përpjekje e re për zgjidhjen e këtij problemi esencial dhe të ndjeshëm, të cilin e ka Republika e Greqisë me emrin tonë kushtetues, ndërsa i cili njëherësh është pengesë për proceset tona integruese. Proceset po fillojnë, më 20 apo 21 nëntor presim të bëhet takimi i parë midis negociuesve të të dyja vendeve, me ndërmjetësin Methew Nimetz”, tha Zaev.

Zaev theksoi se edhe këtë muaj pritet intensifikimi i negociatave. “Ne në Maqedoni, po përpiqemi të ndërtojmë konsensus kombëtar, të gjithë, presidenti i shtetit, Qeveria, opozita, por në funksion të gjetjes së zgjidhjes dhe jo në anulimin e tij”, theksoi kryeministri i Maqedonisë./Telegrafi/